Infektuar: 10988
Shëruar: 6616
Vdekur: 373
Kosova merr hua 100 milionë euro nga Komisioni Evropian për ta luftuar pandeminë

Kosova merr hua 100 milionë euro nga Komisioni Evropian për ta luftuar pandeminë

Ekonomia July 30, 2020 - 17:22

Kosova ka nënshkruar marrëveshjen e huasë me Komisionin Evropian për asistencë makro-financiare në vlerë prej 100 milionë euro.

Zyra e BE-së në Kosovë, ka njoftuar se Komisioni Evropian ka nënshkruar Memorandum Mirëkuptimi me Kosovën për t’i hapur rrugë disbursimit të parë prej 50 milionë Euro si asistencë makro financiare (AMF). Kësti i dytë prej 50 milionë € mund të disbursohet më vonë këtë vit ose në fillim të vitit 2021.

“Fondet e AMF do të vihen në dispozicion në formë të kredive afatgjata me kushte mjaft të volitshme. Fondet do të kontribuojnë në forcimin e stabilitetit makroekonomik, në mënyrë që burimet financiare të qeverisë të mund të ndahen për të lehtësuar pasojat e rënda socio- ekonomike të shkaktuara nga pandemia”, thuhet në komunikat.

Nataliya Apostolova, Shefe e Zyrës së BE-së në Kosovë e mirëpriti nënshkrimin e marrëveshjes dhe i bën thirrje Kuvendit të Kosovës që me shpejtësi të vazhdojë me ratifikimin e kësaj marrëveshjeje të financimit, kështu që mos të vonohet procesi i disbursimit të përkrahjes financiare.

Sipas njoftimit, me Memorandum të Mirëkuptimit u dakorduan nëntë kushte të politikave të cilat e mbështesin programin. Ato përfshijnë masat që lidhen me forcimin e financave publike dhe stabilitetin financiar, adresimin e papunësisë së të rinjve dhe përmirësimin e qeverisjes së mirë dhe luftën kundër korrupsionit./Zëri