Infektuar: 1047
Shëruar: 794
Vdekur: 30
Trusti e merr teposhtën, shkak koronavirusi
Foto: Laura Hasani

Trusti e merr teposhtën, shkak koronavirusi

Ekonomia April 06, 2020 - 15:48
Për një ditë Trusti i ka humbur 12.8 milionë euro në investime, teksa për 3 muaj të këtij viti humbjet përllogaritet të jenë 103.3 milionë euro
Image

Paratë e tatimpaguesve kosovarë nuk i kanë shpëtuar krizës në tregjet financiare globale si pasojë e pandemisë COVID-19. Fondi i Kursimeve Pensionale për një ditë ka humbur 12.8 milionë euro në investime, teksa të dhënat e prezantuara nga Trusti tregojnë se humbja brenda 3 muajve të këtij viti llogaritet të jetë 103.3 milionë euro, shkruan “Zëri”.

Nga Trusti është thënë që kjo gjë nuk do të ndikojë te kontributet e personave të cilët do të pensionohen gjatë këtij viti. Kjo pasi, sipas tyre, me krijimin e portofolit konservativ është vendosur mbrojtja e këtyre kontributdhënësve.

“Bordi Drejtues ka themeluar një portofol konservativ, i cili nuk do të ndikohet nga rënia e tregjeve financiare. Pra, asnjë kontribuues i pensionuar gjatë vitit 2020 nuk do të preket nga rënia e tregjeve financiare. Krijimi i këtij portofoli ishte edhe mënyra e vetme ligjore që aktualisht FKPK-ja e ka dispozicion për t’i mbrojtur personat që do të pensionohen përgjatë vitit”, është bërë e ditur nga Trusti.

Në ndërkohë, gjatë vitit të kaluar Fondi i Kursimeve Pensionale i Kosovës (Trusti) pati arritur të kthejë 161 milionë euro nga investimet. Fondi total që iu afrua ishte 2 miliardë eurove e që shënoi një rritje vjetore prej 300 milionë eurosh. Po ashtu në vitin 2019 ky institucion pati arritur një performancë pozitive nga investimet prej 8,9%, ndërkohë kthimi bruto shkoi në rreth +161 milionë euro në total.

Lekaj: Bota mund të goditet nga një recesion i paimagjinueshëm

Anëtari i Komisionit për Ekonomi, Punësim, Tregti, Industri, Ndërmarrësi dhe Investime Strategjike nga AAK-ja, Pal Lekaj, ka thënë për “Zërin” se situata ekonomike e krijuar në botë nga pandemia COVID-19 është një situatë e re e që sipas tij në rast se vazhdon për një kohë më të gjatë ka rrezik që bota të përballet me një recesion të paimagjinueshëm.

“Situata aktuale e krijuar nga COVID-19 është diçka e re për shumë njerëz në mbarë botën. Masat e tilla mbrojtëse, të cilat kanë ulur dukshëm ekonominë, nuk mbahen mend të kenë ndodhur ndonjëherë tjetër. Ne duhet t’u përmbahemi rregullave mbrojtëse sa më shumë, në mënyrë që ta tejkalojmë sa më parë. Duhet të përpiqemi maksimalisht që të mos lejojmë përhapjen e këtij virusi dhe të presim deri në zbulimin e vaksinës. Krejt kjo është humbje e madhe për ekonominë botërore. Nëse e gjithë kjo zgjat, atëherë bota mund të goditet nga një recesion i paimagjinueshëm. Duke vendosur masa mbrojtëse, ndërmarrjet private janë duke u ballafaquar me humbje të mëdha. Shitjet janë reduktuar, ndërsa bizneset kanë mbetur pa përkrahje”, ka thënë ai.

Për sa u përket humbjeve të fundit të shkaktuara në Trust si rezultat i pandemisë, Lekaj ka theksuar se është ende herët që të dihen shifrat e sakta të dëmeve.

“Unë besoj që për shkak që për shumë punonjës janë ndalur pagat, për ta nuk do të ketë as kontribute në fondin e pensioneve. Duhet theksuar se sa më gjatë të vazhdojë kjo pandemi, aq më keq do të bëhet. Është ende herët të dihet se sa janë shifrat e dëmeve, por pas disa javësh Qeveria duhet të bëjë llogaritjet dhe të ndërmerren masa. E rëndësishme është që këto humbje të mos ndihen te qytetarët. P.sh. të mos ulen pensionet, por të kompensohen nga shteti. Për fund, shpresojmë që fundi i kësaj pandemie të jetë afër, që të kemi sa më pak kriza financiare”, ka thënë ai.

Kadrijaj: Trust-i dhe Qeveria mund të lidhin marrëveshje për shpëtimin e kontributeve të qytetarëve

Njohësi i çështjeve ekonomike Mustafë Kadrijaj ka thënë për “Zërin”, që lëvizjet ekonomike në nivel botëror padyshim që ndikojnë edhe në Trust.

“Për fat jo të mirë kjo është normal në rast të krizave për faktin që Trusti Pensional i ka të afatizuara mjetet në tregjet financiare ndërkombëtare që çdo lëvizje ekonomike në nivel botërorë është normale që të ndikoj edhe Trustin Pensional në Kosovë. Në këtë rast do të kemi humbje për faktin që niveli i aktivitetit ekonomik botëror ka pësuar rënie kështu që bie vlera e aksioneve në nivel botëror”, ka thënë Kadrijaj për “Zërin”.

Sipas tij kjo gjë do të ndikojë edhe tek kontribuesit në Trustin Pensional

“Pra edhe ne si kontribues në Trustin Pensional do kemi pasoja. Sa do që do jenë ato vlera duhet të pajtohemi sepse dhe Trusti Pensionale nuk mund të i tërheq mjetet. Kjo pas që pjesëmarrja në tregjet financiare e ka të njohur këtë risk. E vetmja mundësi që nëse ka ende mjete Tusti që nuk i ka në tregjet ndërkombëtare dhe mund të lidh marrëveshje me qeverinë që në këtë kohë të përkrah krizën dhe mbasi kalimit të pandemisë COVID-19, t`i kthejnë sipas marrëveshjes”, ka thënë ndër të tjera ai.

Sipas tij në rast të lidhjes së marrëveshjes me Qeverinë për menaxhimin e mjeteve të Trustit, rrizku është më i vogël.

“Niveli i rriskut është më i vogël dy faktor së pari gjasat që qeveria të i kthej janë të mëdha njëherësh nuk ikin mjetet jashtë vendit. Pra pa marrë parasysh që do dëmtohemi është diçka normale gjithnjë duke mos i përjashtuar për ndonjë abuzim nga menaxhmenti i Trustit Pensionl që në këtë rast organet relevante duhet të jenë vigjilente duke invenstiguar aktivitetet t e Fondit Pensional”, ka thënë Kadrijaj. /ZËRI

Lexo edhe AAK-ja propozon ndarjen e nga 100 eurove për çdo qytetar
Aktuale April 06, 2020