Katër kompani nga Kosova po marrin pjesë në Panairin e Mobilierisë në Gjermani

Ekonomia January 17, 2019 - 19:42
Lexo Detajet

Për të tretën herë me radhë kompanitë nga Kosova po marrin pjesë në panairin ndërkombëtar të mobilierisë dhe enterierit “IMM”, që po mbahet në Këln të Gjermanisë, nga data 14-20 janar 2019.

Në mbështetje të kompanive të Kosovës ministri i Tregtisë dhe Industrisë, Endrit Shala, i ka vizituar produktet e kompanive kosovare të ekspozuara në këtë panair, i cili është njëri nga panairet më të mëdha ndërkombëtare të mobilierisë dhe të interierit.

Duke e pasur parasysh përkrahjen e prodhuesve vendorë, Ministria e Tregtisë dhe Industrisë, të cilën e drejton ministri Endrit Shala, sektorin e drurit e ka vendosur në top-prioritet, që me eksportin e deritanishëm e meriton një vlerësim maksimal, edhe për kundër kostos së lartë ka bërë të mundur pjesëmarrjen e bizneseve kosovare në këtë panair me interes shumë të lartë për sipërmarrësit.

“MTI/KIESA për realizimin e këtij panairi, ku kompanitë kosovare paraqiten në hapësira me madhësi mbi 500 m2, ka ndarë buxhet në vlerë prej 77 mijë e 187 eurosh (buxhet ky i cili ka qenë i mbetur tek UNDP-ja dhe njëherësh edhe nga UNDP-ja është bërë pagesa e kësaj vlere direkt tek organizatori i IMM-së), ndërsa pjesa tjetër e mbetur është mbuluar nga USAID-i, GIZ-i, SIDA dhe nga vetë kompanitë kosovare.

Kompanitë kosovare të cilat po marrin pjesë në ketë panair janë: “Elnor”, “Albed”, “Graniti” dhe “Ventius” (“Comodita” prodhues i dyshekëve), të cilat po i prezantojnë produktet e tyre, si: kuzhina, dhoma të fjetjes, divane, tryeza, karrige, dyshekë dhe elemente të ndryshme të enterierit”, thuhet në komunikatën për medie të Ministrisë së Tregtisë dhe Industrisë.

Aty më tutje thuhet se MTI-ja dhe KIESA përmes formave institucionale janë duke i stimuluar kompanitë prodhuese për pjesëmarrje në panaire ndërkombëtare për të promovuar prodhimet kosovare dhe njëkohësisht për të krijuar mundësi për rritje të eksportit dhe në veçanti për ngritje të imazhit të Kosovës përmes paraqitjes së mirë prezantuese dhe ekspozimit të prodhimeve cilësore.

“Duke e ditur së tregu i Evropës është një treg atraktiv për prodhuesit kosovarë si nga aspekti i afërsisë, ashtu edhe nga aspekti i shkëmbimit të përvojave dhe për këtë arsye ky sektor është vendosur në planin e punës së MTI/KIESA-s për organizimin e pjesëmarrjes edhe në panairin ‘IMM 2019’ dhe në MOW 2019’.

Përvoja e deritashme e pjesëmarrjes në këto panair ka treguar se sektori i drurit është në rritje të vazhdueshme dhe se prodhimet nga ky sektor janë duke krijuar tregje të reja dhe të sigurta për eksport në drejtim të Evropës. Duke u bazuar nga të dhënat e vitit të kaluar nga SHPDK-ja, pritet që të ketë eksport në vlerë prej 900 mijë eurosh në vitin 2019 si rezultat i ekspozimit të produkteve kosovare në këtë panair”, thuhet në fund të komunikatës së MTI-së./zeri.info/

Image

Image

Image