Dogana e Kosovës rrit të hyrat brenda një viti
Dogana e Kosovës ka njoftuar se për gjashtë mujorin e parë të këtij viti (janar-qershor), të hyrat e përgjithshme të inkasuar nga Dogana e Kosovës në total arritën vlerën prej rreth 504.3 milionë euro gjë që krahasuar me periudhën e njëjtë të vitit të kaluar paraqet një rritje prej 3.5 për qind apo rreth 17 milionë euro më shumë, transmeton "Zëri.info".
Për këtë të arritur Dogana e Kosovës ka njoftuar se që nga themelimi i doganës dhe deri tani është hera e parë që në gjashtë mujorin e parë të vitit Dogana të kaloj 500 milion euro.
Ndikim në të hyrat në import për ketë periudhë ka pasur efekti i MSA dhe pakove fiskale që i referohen prodhuesve, ku duhet theksuar se ndikimi në të hyra nga MSA përgjatë kësaj periudhe është rreth 21 milionë euro apo rreth 46.3 për qind më shumë se sa periudha e njëjtë e vitit të kaluar, ndërsa ndikimi në të hyra doganore nga pako fiskale që i referohen lirimit nga taksat ne import për prodhuesit përgjatë periudhës raportuese është rreth 29.6 milionë.
Dogana po ashtu njofton se edhe ndikimi në të hyra nga importi i veturave te përdorura ku vërehet një rënie e theksuar krahasuar me vitin e kaluar, ku kemi 5,335 copë vetura më pak, dhe kjo ka ndikuar që të shënohet një rënie në të hyra prej 8.6 milionë euro më pak.
Totali i ndikimeve negative në të hyra nga këto kategori për ketë periudhe është afër 60 milionë apo shprehur në përqindje rreth 12 për qind e totalit të të hyrave të grumbulluar nga Dogana e Kosovës për këtë gjashtë mujor.
Përkundër politikave fiskale që favorizojnë lirime dhe ulje taksash në kategori të caktuara, si stimulim i zhvillimit ekonomik, si dhe ato që burojnë nga marrëveshja e Stabilizim Asociimit, që ketë vit pritet të këtë ndikim më shumë në të hyrat e planifikuara, prapë Dogana e Kosovës është duke vazhduar me performancë shumë të mire në grumbullimin e të hyrave, luftimin e ekonomisë joformale, kontrabandës dhe fusha tjera që Dogana ka përgjegjësi, mirëpo gjithashtu në vlerësojmë se këto efekte te politikave fiskale dhe MSA, do të kenë efektin e vet pozitiv shumë më të madhe për zhvillimin ekonomik te vendit dhe rritjes të prodhimeve vendore.
