Meloni: Italia do të jetë vëzhguese në Bordin e Paqes për Gazën

Në një kënd të sallës gjigante Mandela Hall, e cila po mikpret Samitin vjetor të Bashkimit Afrikan, ku ishte e ftuar si mysafire nga Europa, kryeministrja e Italisë, Giorgia Meloni, duke folur me katër media italiane, përfshirë Repubblica, bëri të ditur disa qëndrime të rëndësishme për marrëdhëniet ndërkombëtare dhe angazhimin e vendit të saj në iniciativat globale.

Ajo u pyet mbi fjalimin e ashpër të kancelarit gjerman Friedrich Merz, i cili dje në Mynih kritikoi kulturën MAGA dhe foli për “çarjet mes Bashkimit Evropian dhe Shteteve të Bashkuara të Amerikës”.

“Jemi në një fazë shumë komplekse të marrëdhënieve ndërkombëtare, një periudhë të veçantë të raporteve mes Evropës dhe SHBA-së. Mendoj se Merz bën një vlerësim të drejtë kur thotë se Europa duhet të kujdeset për veten, të bëjë më shumë, për shembull në fushën e sigurisë dhe të mbajë fort rolin e saj brenda NATO-s. Unë jam dakord me këtë, pavarësisht marrëdhënieve me SHBA-në. Por unë gjithashtu mendoj se duhet të punojmë për një integrim më të madh mes Evropës dhe Shteteve të Bashkuara, për të vlerësuar atë që na bashkon dhe jo atë që na ndan. Kjo është shumë e rëndësishme për të gjithë, veçanërisht për vendet evropiane.

Megjithatë, kjo nuk e heq detyrimin që Evropa të punojë për të rikthyer rolin e saj si aktor gjeopolitik i fuqishëm dhe i pavarur. Pyetja që duhet të bëjmë është: çfarë duhet të bëjmë për të qenë të fortë, të aftë dhe të pavarur në një epokë ku bashkëpunimi gjeopolitik është gjithnjë e më i pakët”, tha Meloni.

Kur u pyet nëse ndan kritikën e Merz ndaj kulturës MAGA, Meloni tha qartë se nuk e mbështet mendimin e kancelarit gjerman. “Jo, nuk do të thoja kështu. Këto janë vlerësime politike, çdo lider e bën vlerësimin sipas gjykimit të vet, por nuk është një temë që i përket kompetencës së Bashkimit Evropian”.

Në një tjetër pjesë të intervistës, kryeministrja italiane njoftoi se Italia do të marrë pjesë në Bordin e Paqes të presidentit Donald Trump, por vetëm si vëzhguese. Sipas saj, të enjten do të mbahet një takim në Uashington. “Jemi ftuar si vend vëzhgues dhe kjo është një zgjidhje e mirë. Italia po punon për stabilizimin e Lindjes së Mesme, ku situata është shumë komplekse dhe e brishtë. Besoj se një prani italiane, dhe po ashtu evropiane, është e domosdoshme. Prandaj, ne do të përgjigjemi pozitivisht për këtë ftesë”.

Megjithatë, kryeministrja theksoi se nuk është ende e qartë “në cilin nivel” do të mbahet samiti në SHBA, në nivel liderësh apo në nivel ministrash. Ajo shtoi se pritet pjesëmarrja edhe e vendeve të tjera evropiane, veçanërisht atyre mesdhetare nga ana lindore. “Ne nuk do të jemi të vetmit. Po diskutojmë edhe në këto orë për detajet e pjesëmarrjes”, përfundoi Meloni.

Ky qëndrim i kryeministres italiane pasqyron një linjë diplomatike që synon balancimin mes mbështetjes për SHBA-në dhe ruajtjes së pavarësisë evropiane, si dhe nënvizon rëndësinë e një prezence aktive italiane dhe evropiane në forumet ndërkombëtare për paqen dhe stabilitetin global.