Dëgjohen shpërthime në kryeqytetin e Venezuelës, njerëzit të alarmuar dalin në rrugë

Shpërthime, zhurma të forta dhe avionë që fluturonin në lartësi të ulët janë dëgjuar në kryeqytetin e Venezuelës, Karakas, ndërsa një pjesë jugore e qytetit mbeti pa energji elektrike, sipas raportimeve dhe dëshmive të banorëve. Shkaku i shpërthimeve nuk dihet qartë aktualisht.

Të paktën shtatë shpërthime u dëgjuan rreth orës 2:00 të mëngjesit me orën lokale dhe njerëz në lagje të ndryshme dolën me nxitim në rrugë, raporton agjencia Associated Press, transmeton Express.

Qeveria e Venezuelës nuk iu përgjigj menjëherë një kërkese për koment.

Shpërthimet ndodhin në një kohë tensioni të shtuar mes Shteteve të Bashkuara dhe Venezuelës. Ushtria amerikane ka goditur javët e fundit anije që dyshohet se janë përfshirë në trafik droge.

Donald Trump ka premtuar vazhdimisht operacione tokësore në Venezuelë, në kuadër të përpjekjeve për të ushtruar presion ndaj presidentit Nicolás Maduro që të largohet nga pushteti. Këto përfshijnë zgjerimin e sanksioneve, rritjen e pranisë ushtarake amerikane në rajon dhe më shumë se dy duzina sulmesh ndaj mjeteve lundruese që dyshohet se janë përfshirë në trafik droge në Oqeanin Paqësor dhe Detin e Karaibeve.

Pentagoni gjithashtu nuk iu përgjigj menjëherë një kërkese për koment.