Gjermania harton plan sekret lufte: Dokumenti 1.200 faqesh mobilizon 800 mijë trupa kundër kërcënimit rus
Gjermania ka hartuar një plan sekret ushtarak prej 1.200 faqesh, të quajtur OPLAN DEU, për përgatitjen ndaj një konflikti të mundshëm me Rusinë. Dokumenti parashikon mobilizimin e deri në 800 mijë trupave gjermane, amerikane dhe të NATO-s në frontin lindor, raportojnë mediat gjermane.
Sipas informacioneve, hartimi i planit ka nisur rreth dy vjet e gjysmë më parë në bazën ushtarake Julius Leber në Berlin, ku 12 oficerë të lartë kanë punuar konfidencialisht në simulimin e një skenari lufte. Tani, ai plan po testohet përmes ushtrimeve praktike në të gjithë Gjermaninë.
Dokumenti detajon rrugët e transportit për trupa dhe pajisje, përfshirë porte, lumenj, hekurudha dhe autostrada. Për shkak të pozitës gjeografike dhe barrierave natyrore si Alpet, ekspertët theksojnë se çdo përforcim i NATO-s drejt lindjes duhet të kalojë përmes Gjermanisë, duke e bërë atë qendrën kryesore logjistike të aleancës.
Plani bazohet në një qasje të re “të gjithë shoqërisë”, që bashkon sektorin civil dhe atë ushtarak, duke ruajtur elemente të doktrinave të Luftës së Ftohtë, por të adaptuara me sfidat e sotme, si infrastruktura e dëmtuar dhe kapacitetet më të vogla ushtarake.
Zyrtarët gjermanë vlerësojnë se Rusia mund të arrijë kapacitet të plotë për të sulmuar një vend të NATO-s rreth vitit 2029, por paralajmërojnë se veprimet e fundit të Kremlinit – spiunazhi, sabotimet dhe shkeljet e hapësirës ajrore – tregojnë se rreziku mund të vijë edhe më herët. Analistët shtojnë se një armëpushim i përkohshëm në Ukrainë do t’i jepte Moskës mundësi të zhvendoste fokusin drejt vendeve të Evropës Lindore.
Ushtrimet e fundit në Gjermaninë lindore përfshinë ngritjen e një kampi të përkohshëm për 500 ushtarë nga kompania Rheinmetall brenda 14 ditësh. Stërvitjet evidentuan pengesa të mëdha, si terreni i papërshtatshëm, nevoja për semaforë të rinj përgjatë korridoreve ushtarake dhe vështirësi në lëvizjen e mjeteve të rënda.
Infrastruktura gjermane, dikur shtyllë kyçe e operacioneve të Luftës së Ftohtë, është rënduar ndjeshëm: 20% e autostradave kanë nevojë për riparime, një e katërta e urave nuk përballojnë më ngarkesat ushtarake, ndërsa portet në Detin e Veriut dhe Baltik kërkojnë rreth 15 miliardë euro investime.
Rreziqet janë theksuar edhe nga incidente të fundit, si përplasja e anijes holandeze Rapida me një urë në lumin Hunte, që bllokoi transportin e municioneve për Ukrainën. Përveç kësaj, ligjet strikte për mbrojtjen e të dhënave, rregulloret e vjetra dhe kufizimet për fluturimin e dronëve në zona urbane po e vështirësojnë reagimin ushtarak në kohë reale.
Gjatë ushtrimit “Red Storm Bravo” në Hamburg, një konvoj me 65 mjete dhe 500 ushtarë u përball me protesta të simuluara dhe sulme me dronë, duke shkaktuar vonesa të paparashikuara – një tregues i kompleksitetit të operacioneve në terren.
Kancelari gjerman Friedrich Merz ka paralajmëruar se Evropa po hyn në një epokë të re pasigurie.
“Kërcënimet janë reale. Nuk jemi në luftë, por nuk jetojmë më në paqe”, ka thënë ai.
Edhe pse sekret, OPLAN DEU përshkruhet si një plan për transformimin e Gjermanisë në një shtet të gatshëm për çdo skenar lufte, duke ndërthurur logjistikën, infrastrukturën civile, ushtrinë dhe bashkëpunimin me NATO-n. Zyrtarët theksojnë se qëllimi i tij kryesor mbetet parandalimi.
“Duam t’i tregojmë kundërshtarit se një sulm nuk do të ketë sukses”, thonë ata.
