Gjykata e OKB-së: Kemi pjesërisht juridiksion për ta trajtuar çështjen e gjenocidit në Ukrainë
Gjykata e Lartë e Kombeve të Bashkuara tha të premten se ka juridiksion për të vendosur mbi një kërkesë të Ukrainës për një deklaratë se Kievi nuk është përgjegjës për gjenocidin, por jo për aspekte të tjera të një rasti ukrainas kundër Rusisë.
Të dy vendet në periudha të ndryshme kanë akuzuar njëri-tjetrin për kryerjen e gjenocidit, shkruan Associated Press, transmeton Klan Kosova.
Ukraina e paraqiti rastin e saj në Gjykatën Ndërkombëtare të Drejtësisë vetëm disa ditë pas pushtimit të Rusisë në shkurt 2022, duke pretenduar se Moska përdori pretendime të rreme për gjenocid për të justifikuar sulmin e saj që shkaktoi konfliktin më të madh në Evropë që nga Lufta e Dytë Botërore.
Por gjykata tha se nuk mund të vendoste për këtë çështje. Në vend të kësaj, ajo do të vendosë nëse Ukraina e shkeli konventën – siç pretendoi presidenti rus Vladimir Putin për të justifikuar pushtimin.
Një vendim përfundimtar, ligjërisht i detyrueshëm ka të ngjarë të jetë ende shumë vite larg.
Gjykata tha se nuk kishte juridiksion për të vendosur nëse pushtimi i Rusisë shkelte konventën e gjenocidit të vitit 1948 dhe nëse njohja nga Moska e dy republikave të shkëputura në Ukrainën lindore përbën gjithashtu shkelje të konventës.
Pavarësisht këtyre pengesave, Ukraina e përshëndeti vendimin si një fitore që do të lejojë vazhdimin e çështjes.
Ukraina gjithashtu përshëndeti faktin që një urdhër paraprak i gjykatës që Rusia të ndalojë menjëherë pushtimin e saj mbetet në fuqi – edhe pse Moska e ka shpërfillur atë.
