Pilula anti-COVID e “Pfizer”-it merr dritën jeshile të EMA-s për përdorim në BE
Foto: AP

Pilula anti-COVID e “Pfizer”-it merr dritën jeshile të EMA-s për përdorim në BE

Bota January 27, 2022 - 18:55

Agjencia Evropiane e Barnave (EMA) tha të enjten se ka miratuar pilulën anti-COVID të kompanisë “Pfizer”, ilaçin e quajtur “Paxlovid”, duke u bërë kështu ilaçi i parë antiviral i që administrohet përmes gojës i autorizuar për përdorim në Bashkimin Evropian.

“Komiteti i EMA-s për Produkte Medicinale për Përdorim Njerëzor (CHMP) ka rekomanduar dhënien e një autorizimi të kushtëzuar të marketingut për ilaçin oral antiviral ‘Paxlovid’”, tha rregullatori i BE-së në një deklaratë, raportojnë “Euronews” dhe AFP.

EMA rekomandoi “autorizimin e ‘Paxlovid’-it për trajtimin e COVID-19 tek të rriturit që nuk kanë nevojë për oksigjen shtesë dhe që janë në rrezik të shtuar që sëmundja të bëhet e rëndë”.

Antiviralët funksionojnë duke reduktuar aftësinë e një virusi për t’u riprodhuar, duke frenuar kështu sëmundjen, transmeton Zeri.info.

Pilulat po priten me padurim sepse janë të lehta për t’u administruar dhe thjesht mund të merren në shtëpi me një gotë ujë.

“Pfizer” tha në dhjetor se “Paxlovid”-i uli pranimet në spital dhe vdekjet tek njerëzit në rrezik deri në 90 për qind kur merret në ditët e para pas shfaqjes së simptomave.

Ulja e shtrimeve në spital dhe vdekjet nga COVID

EMA vlerësoi të dhënat nga një studim që përfshin pacientët me COVID-19 që tregonin se “trajtimi me ‘Paxlovid’ uli ndjeshëm shtrimet në spital ose vdekjet te pacientët që kishin të paktën një gjendje themelore që i vinte ata në rrezik të COVID-19 të rëndë”.

Shumica e pacientëve në studim ishin të infektuar me variantin Delta, tha EMA, ndërsa vuri në dukje se testet laboratorike tregojnë se “Paxlovid” ka mundësi të jetë efektiv edhe kundër variantit “Omicron”.

Pilula e “Pfizer”-it është një kombinim i një molekule të re, PF-07321332, dhe e barit antiviral “Ritonavir” për HIV, të cilat merren si tableta të ndara.

“Komiteti i EMA-s për Produkte Medicinale për Përdorim Njerëzor ka arritur në përfundimin se përfitimet e ilaçit tejkalojnë rreziqet e tij për përdorimin e miratuar” dhe tani “do t’i dërgojë rekomandimet e tij Komisionit Evropian për një vendim të shpejtë të zbatueshëm në të gjitha Shtetet Anëtare të BE-së”, tha rregullatori.

Procesi i miratimit nga Komisioni zakonisht zgjat disa orë ose ditë.

“Me miratimin e ‘Paxlovid’-it këtë javë, gjashtë ilaçe anti-COVID janë autorizuar si pjesë e strategjisë terapeutike të BE-së”, tha në një deklaratë Komisionerja Evropiane për Shëndetin dhe Sigurinë Ushqimore, Stella Kyriakides.

Shtetet e Bashkuara, Kanadaja dhe Izraeli janë në mesin e një pjese të vogël të vendeve që tashmë i kanë dhënë dritën jeshile trajtimit të ri nga “Pfizer”-i. /Zëri