Sllovakia pranon dozat e para të vaksinës ruse

Sllovakia pranon dozat e para të vaksinës ruse

Bota March 01, 2021 - 22:02

Sllovakia pranoi të hënën 200,000 dozat e para të vaksinës ruse kundër koronavirusit, Sputnik V.

Ky është vendi i dytë i Bashkimit Evropian, pas Hungarisë, që siguron këtë vaksinë.

Javën e kaluar, Sllovakia ka pasur normën më të lartë në botë të vdekjeve për kokë banori nga koronavirusi.

“Është në rregull të blihet vaksina ruse, sepse COVID-19 [sëmundja që e shkakton koronavirusi] nuk di asgjë për gjeopolitikën”, tha kryeministri sllovak, Igor Matoviç.

“Unë nuk e kam problem ta marr vaksinën Sputnik”, shtoi ai.

Sllovakia ka blerë dy milionë vaksina Sputnik V dhe pret që gjysma e tyre t’i arrijnë këtë muaj.

Ministri sllovak i Shëndetësisë, Marek Krajçi, tha se vaksinimi me Sputnik V mund të fillojë brenda javësh.

Në Çekinë fqinje, kryeministri Andrej Babis tha se edhe vendi i tij mund ta përdorë vaksinën Sputnik V për të luftuar pandeminë.

Rusia ka miratuar vaksinën e saj në muajin gusht, duke u bërë vendi i parë në botë me vaksinë kundër koronavirusit.

Kjo ka bërë që shkencëtarët në gjithë botën të vënë në dyshim sigurinë dhe efikasitetin e saj, pasi ajo është regjistruar përpara se studimet e fazës së tretë të testimit të bëheshin të disponueshme.

Por, në fillim të shkurtit, rezultatet e testimeve të publikuara në revistën globale mjekësore Lancet, kanë treguar se Sputnik V - vaksinë që jepet në dy doza - është 91.6 për qind efektive kundër koronavirusit.

Kjo përqindje është e ngjashme me atë të vaksinave të zhvilluara në Perëndim.

Vaksina ruse është miratuar për përdorim në rreth 30 vende./REL