Macron do të vizitojë Serbinë, temë kryesore Kosova

Bota January 28, 2019 - 08:30
Detajet

Presidenti i Francës, Emmanuel Macron, pritet që pas disa javësh ta vizitojë Serbinë, transmeton lajmi.net.

Siç bën të ditur “Vreçenje Novosti”, ende nuk dihet data e saktë e vizitës së tij.

Këtë e ka konfirmuar ambasadori francez në Beograd, Frederic Mondoloni.

Sipas Mondolonit, temë kryesore në këtë vizitë të presidentit Macron do të jetë situata në rajon dhe gjetja e një zgjidhjeje për çështjen e Kosovës, transmeton më tutje lajmi.net.

Mondoloni i ka thënë gazetës se Franca e mbështetë dialogun Kosovë-Serbi dhe se nuk kanë informacione që ky dialog pritet të përfundoj në qershor të këtij viti.

“Sa më shpejt të arrihet marrëveshja, aq më mirë. Ne i kërkuam Kosovës që të tërheqë vendimin mbi taksën dhe shpresojmë se kjo do të ndodhë së shpejti”, ka deklaruar ambasadori Mondoloni.

Tutje ambasadori ka thënë se është duke bërë përpjekje maksimale dhe është duke koordinuar agjendën e presidentit Macron për vizitën e tij në Beograd.

Sipas tij, vizita e paralajmëruar e presidentit Macron për në dhjetor të vitit të kaluar nuk ishte anuluar por siç tha ai, ishte shtyrë për shkak të zhvillimeve në Francë.