“Home Alone” po përgatitet për një film të ri pas 34 vjetësh

Një lajm i bukur ka ardhur për të gjithë adhuruesit e filmit legjendar të Krishtlindjeve, “Home Alone”. Pas më shumë se tri dekadash, Kevin McCallister mund të rikthehet sërish në ekran, këtë herë me një histori krejtësisht të re.

Sipas raportimeve të mediave ndërkombëtare, një vazhdim i ri i “Home Alone” është në fazën e zhvillimit, ndërsa aktori Macaulay Culkin pritet të rikthehet në rolin që e bëri të famshëm në mbarë botën.

Në këtë projekt raportohet se janë përfshirë edhe Seth Rogen dhe Evan Goldberg, të cilët do të kontribuojnë në skenarin dhe produksionin e filmit të ri. Megjithatë, detajet e historisë ende nuk janë bërë publike.

Më herët, Culkin kishte shprehur interesimin për një rikthim të Kevin McCallister, duke propozuar një histori ku personazhi i tij, tashmë i rritur dhe baba, do të përballej me sfida të reja familjare.

Edhe pse projekti ka ngjallur interesim, ende nuk ka një datë zyrtare për premierën. Mbetet të shihet nëse ky rikthim do të sjellë nostalgjinë dhe humorin që e kthyen “Home Alone” në një nga filmat më të dashur të festave.