Arrestohet polici ferizajas, dyshohet për organizim të bixhozit të paligjshëm dhe armëmbajtje pa leje

Inspektorati Policor i Kosovës (IPK) ka arrestuar një polic në Ferizaj, nën dyshimin se i njëjti ka kryer veprën penale “Organizim të skemave piramidale dhe bixhozit të paligjshëm”, “Mbajtje në pronësi, kontroll ose posedim të paautorizuar të armëve”, si dhe “Përdorim të armës ose mjetit të rrezikshëm”.

Sipas IPK-së, i njëjti është dërguar në mbajtje për 48 orë.

IPK-ja bën të ditur se gjatë së martës janë bastisur shtatë lokacione, ku janë sekuestruar dy armë të shkurtra, një armë e gjatë e gjuetisë, dy armë të ftohta (thika), si dhe municion i llojeve të ndryshme.

“Arrestimi i zyrtarit policor është bërë me dyshimin se i njëjti ka qenë i përfshirë në aktivitete të kundërligjshme, që përfshijnë organizim të skemave piramidale dhe bixhozit të paligjshëm, mbajtje në pronësi, kontroll ose posedim të paautorizuar të armëve, si dhe përdorim të armës apo mjetit të rrezikshëm. Me aktvendim të prokurorit, të dyshuarit i është caktuar masa e ndalimit për 48 orë. Si pjesë e veprimeve hetimore nga hetuesit e IPK-së dje janë bastisur shtatë lokacione, ku janë sekuestruar dy armë të shkurtra, një armë e gjatë e gjuetisë, dy armë të ftohta (thika), si dhe municion i llojeve të ndryshme. Sipas dyshimeve fillestare, zyrtari policor jashtë detyrës zyrtare gjatë vitit 2026 ishte përfshirë në organizimin e bixhozit të paligjshëm në formë online, si dhe dyshohet se kishte mbajtur në posedim një armë të gjatë të tipit Kallashnikov, të cilën më pas ia kishte shitur një personi tjetër”, thuhet në njoftim.

Njoftimi i plotë i Inspektoratit Policor të Kosovës, pa ndërhyrje:

Inspektorati Policor i Kosovës (IPK) ka arrestuar dje një zyrtar policor nga Stacioni Policor në Ferizaj pas zhvillimit të veprimeve hetimore në koordinim me Prokurorinë e Shtetit.

Arrestimi i zyrtarit policor është bërë me dyshimin se i njëjti ka qenë i përfshirë në aktivitete të kundërligjshme që përfshijnë organizim të skemave piramidale dhe bixhozit të paligjshëm, mbajtje në pronësi, kontroll ose posedim të paautorizuar të armëve, si dhe përdorim të armës apo mjetit të rrezikshëm.

Me aktvendim të prokurorit të dyshuarit i është caktuar masa e ndalimit për 48 orë.

Si pjesë e veprimeve hetimore nga hetuesit e IPK-së dje janë bastisur shtatë (7) lokacione, ku janë sekuestruar dy armë të shkurtra, një armë e gjatë e gjuetisë, dy armë të ftohta (thika), si dhe municion i llojeve të ndryshme.

Sipas dyshimeve fillestare, zyrtari policor jashtë detyrës zyrtare gjatë vitit 2026 ishte përfshirë në organizimin e bixhozit të paligjshëm në formë online, si dhe dyshohet se kishte mbajtur në posedim një armë të gjatë të tipit Kallashnikov, të cilën më pas ia kishte shitur një personi tjetër.

Në kuadër të këtij rasti janë intervistuar edhe gjashtë (6) qytetarë në cilësinë e të dyshuarve për veprën penale “Shitblerja e armëve”, ndaj të cilëve hetimet do të vazhdojnë në procedurë të rregullt.

Ndërkaq, në interes të hetimit dhe bazuar në autorizimet ligjore, IPK-ja i ka rekomanduar Policisë së Kosovës suspendimin e zyrtarit policor.

Hetuesit e Inspektoratit Policor të Kosovës në koordinim me Prokurorinë e Shtetit do të vazhdojnë ndërmarrjen e veprimeve të nevojshme hetimore lidhur me këtë rast në përputhje me autorizimet ligjore. /Zëri