Raportohet se ka vdekur sulmuesi nga Krakovi, i cili vrau gjashtë persona

Sulmuesi 24-vjeçar, i cili vrau gjashtë persona në Krakov të shtunën, ka vdekur në spital si pasojë e plagëve të marra gjatë një shkëmbimi zjarri me policinë, raportoi agjencia Reuters, duke cituar burime policore.

I riu, shtetas polak, u shpall i vdekur të hënën në orën 04:30 të mëngjesit.

Ai ishte shtruar në spital që nga e shtuna dhe gjendja e tij ishte kritike.

Mjekët u përpoqën t’i shpëtonin jetën dhe ai iu nënshtrua ndërhyrjeve kirurgjikale të paktën tri herë gjatë qëndrimit në spital.

“Që në fillim, gjendja e tij ishte shumë e rëndë – kritike. U bënë përpjekje të vazhdueshme për t’i shpëtuar jetën këtij njeriu, pavarësisht së keqes që kishte kryer. Ai iu nënshtrua të paktën tri operacioneve”, thuhet në njoftim.

Sulmi ndodhi të shtunën pasdite pranë Sheshit Kryesor të Tregut në Krakov, në qendrën historike të qytetit – një destinacion i njohur turistik.

Sulmuesi i armatosur hapi zjarr ndaj civilëve; më pas, ai u plagos gjatë një shkëmbimi zjarri me oficerët e policisë dhe u dërgua në spital.

Gjatë kontrollit të mëvonshëm në banesën e tij, policia gjeti edhe tri trupa të tjerë.

Në informacionet e dhëna nuk specifikohet nëse këto viktima përfshihen në shifrën e mëparshme prej gjashtë personash të vrarë.

Prokuroria polake ka nisur një hetim për ngjarjen, duke e trajtuar atë si një akt të dyshuar terrorizmi.

Pas kësaj tragjedie, në Poloni është shpallur një periudhë zie kombëtare dyditore.