Trepça dhe Bora fitojnë në udhëtim, Peja pëson humbjen e pestë radhazi

Trepça dhe Bora kanë shënuar fitore në ndeshjet e xhiros së shtatë të ProCredit Superligës së Kosovës në basketboll.

Kampionia në fuqi e ka mposhtur Sigal Prishtinën, ndërsa Bora ka fituar ndaj Pejës në palestrën “Karagaçi”.

Trepça ka triumfuar ndaj Sigal Prishtinës me rezultat 89:79, në ndeshjen e zhvilluar në Pallatin e Rinisë në Prishtinë, e cila është luajtur pa praninë e shikuesve.

Mitrovicasit e kanë kontrolluar ndeshjen që nga fillimi, duke fituar dy çerekët e parë me rezultat 24:19 dhe 25:21. Epërsinë vendimtare e kanë krijuar në çerekun e tretë, të cilin e kanë fituar 25:15, për ta çuar rezultatin në 74:55.

Prishtinasit kanë reaguar në çerekun e fundit, të cilin e kanë fituar 24:15, por kjo nuk ka mjaftuar për ta rrezikuar fitoren e Trepçës.

Drew Thelwell ka qenë ndër më të dalluarit te skuadra mitrovicase me pesëmbëdhjetë pikë e katër asistime, ndërsa Drilon Hajrizi ka kontribuar me trembëdhjetë pikë, gjashtë kërcime dhe katër asistime. Te Prishtina, Bryson Dawkins ka shënuar tetëmbëdhjetë pikë, ndërsa Malcolm Armstead ka shtuar pesëmbëdhjetë.

Kjo ka qenë fitorja e shtatë radhazi për Trepçën në të gjitha garat, ndërsa e katërta në Superligë. Mitrovicasit kanë pesë fitore e dy humbje dhe renditen në vendin e dytë me dymbëdhjetë pikë. Prishtina ka tri fitore e katër humbje dhe nëntë pikë.

Fitore në udhëtim ka shënuar edhe Bora, që e ka mposhtur Pejën me rezultat 88:75 në palestrën “Karagaçi”.

Me këtë fitore, Bora e ka vazhduar formën e mirë në Superligë, ndërsa Peja vazhdon të kalojë nëpër një periudhë të vështirë, me pesë humbje radhazi.

Skuadra prishtinase e ka nisur më mirë ndeshjen dhe ka krijuar epërsi që në çerekun e parë. Shkëputjen më të madhe e ka bërë në çerekun e dytë, të cilin e ka fituar 28:14.

Në pjesën e dytë, Peja është përpjekur të rikthehet në lojë, por Bora e ka ruajtur epërsinë deri në fund, duke ia shkaktuar skuadrës pejane humbjen e pestë radhazi.

Muhamedali Janjeva ka qenë më efikasi te Bora me njëzet e tri pikë, ndërsa Terrell Allen ka realizuar nëntëmbëdhjetë. Rrezart Memedi ka shtuar gjashtëmbëdhjetë pikë, kurse Laolu Oke e ka mbyllur ndeshjen me njëmbëdhjetë pikë e dymbëdhjetë kërcime.

Te Peja, Gray Ricks Jr. ka shënuar katërmbëdhjetë pikë, ndërsa Jetmir Zeqiri ka kontribuar me dymbëdhjetë pikë e pesë kërcime.