Holanda tërhiqet sërish nga Eurovisioni, shkak Izraeli

Holanda nuk do të marrë pjesë në edicionin e vitit 2027 të Festivalit Evropian të Këngës, Eurovision, pasi transmetuesi publik NPO ka vendosur të tërhiqet sërish për shkak të polemikave që lidhen me pjesëmarrjen e Izraelit.

Vendimi përmbys qëndrimin e mëparshëm të institucionit, i cili muajin e kaluar kishte njoftuar se vendi do të rikthehej në konkurs në vitin 2027.

Drejtori i medias në NPO, Jurre Bosman, deklaroi të martën se pjesëmarrja e Izraelit shkakton reagime të ndryshme në shoqëri, duke nxitur diskutime dhe përçarje.

Për këtë arsye, transmetuesi publik ka vendosur të mos marrë pjesë në Eurovisionin e vitit të ardhshëm.

Holanda: Është ende herët për t’u rikthyer në Eurovision

Kryetarja e NPO-së, Jet de Ranitz, bëri të ditur se organizata kishte zhvilluar diskutime me transmetuesit për mundësinë e pjesëmarrjes në edicionin e ardhshëm.

“Gjatë këtyre diskutimeve, fillimisht menduam se kishte mbështetje të mjaftueshme për t’u rikthyer. Fatkeqësisht, nuk arritëm të gjenim një format të përshtatshëm për këtë.

Si rezultat, duhet të arrijmë në përfundimin se aktualisht është ende herët për të marrë pjesë në Festivalin Evropian të Këngës në vitin 2027.

Për shkak të ndjeshmërisë që rrethon çështjet aktuale, kemi vendosur të tërhiqemi përkohësisht”, u shpreh ajo.

NPO pranoi se vendimi mund t’i zhgënjejë disa fansa holandezë, por konfirmoi se konkursi do të vazhdojë të transmetohet në vend.

Eurovision: E respektojmë vendimin

Drejtori i Festivalit Evropian të Këngës, Martin Green, tha se i vinte shumë keq që Holanda nuk do të ishte pjesë e edicionit të ardhshëm, por theksoi se organizatorët e kuptojnë dhe e respektojnë vendimin e saj.

“Na vjen thellësisht keq që Holanda nuk do të marrë pjesë, por e kuptojmë vendimin e tyre dhe respektojmë ndjenjat e forta që qëndrojnë pas tij”, deklaroi Green.

Ai shtoi se organizatorët e kuptojnë qëndrimet e ndryshme ndaj konkursit, si brenda vendeve, ashtu edhe mes tyre.

“Ne nuk i shpërfillim asnjë prej këtyre qëndrimeve.

Në të njëjtën kohë, besojmë se Festivali Evropian i Këngës ka rëndësi në një botë të përçarë. Ai është një nga rastet e pakta gjatë vitit kur njerëz nga e gjithë Evropa dhe më gjerë bashkohen përmes muzikës, krijimtarisë dhe përvojave të përbashkëta.

Kjo frymë bashkimi është ajo që festivali ka përfaqësuar gjithmonë dhe ne jemi të përkushtuar ta mbrojmë atë”, u shpreh ai.

Green shtoi se organizatorët shpresojnë ta mirëpresin sërish një përfaqësues nga Holanda kur vendi të ndiejë se ka ardhur momenti i duhur për t’u rikthyer.

Edhe vende të tjera kundër pjesëmarrjes së Izraelit

Holanda, Islanda, Spanja, Irlanda dhe Sllovenia bojkotuan Eurovisionin 2026 për shkak të pjesëmarrjes së Izraelit, mes kritikave për veprimet ushtarake të këtij vendi në Gazë dhe në Lindjen e Mesme.

Në përpjekje për të adresuar përçarjet, organizatorët e Eurovisionit kanë njoftuar disa ndryshime, duke përfshirë rregulla që synojnë të përjashtojnë nga organizimi i konkursit vendet e përfshira në konflikte të armatosura, si dhe ndryshime në sistemin e votimit.

Përveç Holandës, edhe Irlanda ka konfirmuar se nuk do të marrë pjesë në edicionin e vitit 2027. Ndërkohë, drejtuesi i transmetuesit publik spanjoll është shprehur në favor të një bojkoti.

Edhe transmetuesi publik çek është tërhequr nga konkursi, por ka argumentuar se vendimi lidhet me shkurtimet e shpenzimeve.

Eurovisioni 2027 do të mbahet në Bullgari

Edicioni i vitit 2027 i Eurovisionit do të zhvillohet më 15 maj në qytetin e Burgasit, në Bullgari.

Bullgaria fitoi të drejtën për të organizuar konkursin pas fitores së këngëtares Dara në edicionin e këtij viti, të mbajtur në Vjenë, me këngën ritmike “Bangaranga”.