Deliu kërkon llogaridhënie urgjente nga KPK-ja për rastin e Arlindës

Deputetja e Partisë Demokratike të Kosovës (PDK), Blerta Deliu, ka kërkuar llogaridhënie urgjente nga Këshilli Prokurorial i Kosovës (KPK) lidhur me rastin e Arlindës, duke ngritur pikëpyetje për veprimet dhe mosveprimet e institucioneve përgjegjëse.

Deliu përmes një postimi në rrjetin social Facebook, ka pyetur se kujt tjetër duhej t’i drejtohej Arlinda për të kërkuar ndihmë, duke kritikuar arsyetimet lidhur me institucionet të cilave ajo u ishte drejtuar.

Sipas deputetes së PDK-së, kërkesat e Arlindës i ishin drejtuar edhe Këshillit Prokurorial të Kosovës.

Deliu ka bërë të ditur se që të hënën ishte arritur dakordim që KPK-ja të ftohej të martën në Komisionin për Legjislacion, por sipas saj, ftesa dhe mbledhja nuk janë realizuar.

“Pse po vonohet llogaridhënia?”, ka pyetur Deliu, duke kërkuar që Këshilli Prokurorial të raportojë sa më shpejt dhe të ofrojë dokumente e përgjigje për çdo veprim dhe mosveprim në këtë rast.

Ajo ka theksuar se Arlinda kishte kërkuar mbrojtje nga shteti, ndërsa ka kërkuar që familja e saj të informohet se çfarë kanë bërë institucionet për ta mbrojtur.

“Këshilli Prokurorial duhet të raportojë urgjentisht, me dokumente dhe përgjigje për çdo veprim e mosveprim. Arlinda kërkoi mbrojtje nga shteti. Familja e saj meriton ta dijë çfarë bëri shteti për të”, deklaroi Deliu.