50 gola të pësuar në 29 ndeshje, Barcelona e trajnerit Flick po pëson shumë gola në Champions

Barcelona po vazhdon të vuajë në repartin defensiv në Ligën e Kampionëve. Humbja 4-2 ndaj Paris Saint-Germainit ka konfirmuar edhe një herë problemet e skuadrës së Hansi Flickut në mbrojtje, e cila po e ka të vështirë ta mbyllë portën përballë kundërshtarëve evropianë.

Sipas Mundo Deportivo, Barcelona ka pësuar të paktën tre gola në shtatë ndeshje nga 29 të zhvilluara në Champions League nën drejtimin e Flickut. Për më tepër, katalunasit kanë regjistruar 18 ndeshje radhazi në këtë garë pa arritur ta përfundojnë takimin pa pësuar gol.

50 gola të pësuar në 29 ndeshje

Shifrat janë shqetësuese për një skuadër që synon të luftojë për trofeun më të rëndësishëm evropian për klube. Në 29 ndeshje të Championsit me Flickun, Barcelona ka pranuar gjithsej 50 gola, me një mesatare prej 1.72 golash për ndeshje.

Vetëm në katër prej këtyre takimeve, katalunasit kanë arritur ta mbajnë portën të paprekur. Hera e fundit ishte në fitoren 4-0 ndaj Borussia Dortmundit, në çerekfinalet e edicionit 2024/25.

Humbje të rënda që përsëriten

Barcelona ka pësuar të paktën tre gola në përballjet ndaj Benficas (5-4), Borussia Dortmundit (3-1), Interit (3-3 dhe 4-3), Club Brugge (3-3), Chelseat (3-0) dhe PSG-së (4-2).

Këto rezultate tregojnë se problemet mbrojtëse nuk janë të izoluara, por janë përsëritur në disa ndeshje të rëndësishme evropiane.

Për Flickun, përmirësimi i mbrojtjes do të jetë një nga detyrat kryesore në vazhdim të sezonit. Barcelona ka potencial të madh në sulm, por për të synuar triumfin në Champions League, duhet të gjejë më shumë ekuilibër dhe të shmangë gabimet që po i kushtojnë gola të shumtë. /Zëri