Mediat portugeze i shpallin "luftë" Ronaldos: “Koha jote ka kaluar”
Cristiano Ronaldo është vënë në shënjestër të mediave portugeze pas përplasjes me përzgjedhësin Jorge Jesus dhe largimit nga grumbullimi i Kombëtares së Portugalisë.
Vendimi i yllit 41-vjeçar për t’u larguar nga kampi i përfaqësueses, pas pakënaqësive për rolin e tij në skuadër, ka shkaktuar reagime të shumta në Portugali.
Një pjesë e mediave vendase kanë kritikuar sjelljen e kapitenit, duke vënë në pikëpyetje vazhdimin e karrierës së tij me kombëtaren.
Sipas tyre, emri dhe kontributi historik i Ronaldos nuk mund t’i garantojnë atij një vend titullari në çdo ndeshje.
Debati u intensifikua pasi Ronaldo mbeti në bankinë ndaj Norvegjisë, ndonëse ishte përgatitur për të hyrë në lojë.
Sulmuesi pretendoi se Jorge Jesus nuk e mbajti premtimin për t’i dhënë minuta, ndërsa trajneri ka paraqitur versionin e tij për situatën.
Sipas gazetarit Nelson Viteirona të gazetës A Bola, arritjet e jashtëzakonshme të Ronaldos dhe statusi i tij si një prej figurave më të mëdha të futbollit portugez nuk duhet të jenë mbi interesat e përbashkëta të skuadrës.
Ai vuri në pikëpyetje edhe mundësinë që ylli i Al-Nassr të trajtohet ndryshe nga lojtarët e tjerë në çështjet disiplinore.
Nga ana tjetër, juristi Gonçalo Almeida kritikoi mënyrën se si konflikti u shndërrua në një krizë publike, duke argumentuar se deklaratat zyrtare dhe reagimet në rrjetet sociale e dëmtuan imazhin e të gjitha palëve.
Edhe ish-futbollisti Diogo Luís kritikoi Federatën Portugeze për mungesën e vendosmërisë në menaxhimin e situatës, por nuk e përjashtoi Ronaldon nga përgjegjësia.
Sipas tij, pavarësisht arsyeve të konfliktit, largimi nga grumbullimi i kombëtares nuk mund të justifikohet.
Ndërkohë, presidenti i Federatës Portugeze, Pedro Proença, ka shprehur dëshirën që Ronaldo të rikthehet te kombëtarja gjatë grumbullimit të nëntorit.
Megjithatë, procedura disiplinore ndaj tij vazhdon dhe vendimi përfundimtar u takon organeve kompetente.
Për momentin, mbetet e paqartë nëse rikthimi i kapitenit do ta mbyllë këtë kapitull të tensionuar apo do të hapë një debat të ri për rolin dhe ndikimin e tij në Kombëtaren e Portugalisë. /Zëri