Harry Kane vendos për të ardhmen, gjithçka drejt rinovimit me Bayern Munichun

Harry Kane pritet të vazhdojë të jetë pjesë e Bayern Munichut edhe përtej përfundimit të këtij sezoni, pasi klubi bavarez ka bërë përparim të rëndësishëm në negociatat për rinovimin e kontratës së sulmuesit anglez.

Sipas raportimeve të Sky, Bayern Munich dhe Kane kanë arritur marrëveshje për kushtet bazë të kontratës së re, ndërsa tani mbeten vetëm disa detaje për t’u finalizuar.

Marrëveshja e re pritet ta mbajë kapitenin e Anglisë në “Allianz Arena” deri në vitin 2029.

Rinovimi i Kane është një nga prioritetet kryesore të klubit gjerman, ndërsa të dyja palët kanë besim të madh se marrëveshja do të mbyllet së shpejti.

Megjithatë, një nga çështjet që ende nuk është sqaruar përfundimisht lidhet me një klauzolë të mundshme lirimi.

Kane raportohet se ka kërkuar një klauzolë që do t’i mundësonte rikthimin në Ligën Premier në të ardhmen.

Në kuadër të kësaj kërkese, është diskutuar edhe mundësia që Tottenham Hotspur, ish-klubi i tij, të ketë të drejtën për të barazuar një ofertë në rast se sulmuesi vendos të rikthehet në Angli.

Ende nuk dihet nëse kjo pikë do të përfshihet në kontratën përfundimtare.

Gjithashtu, nuk është përcaktuar ende një datë konkrete për nënshkrimin e marrëveshjes së re.

Megjithatë, negociatat po ecin në drejtimin e duhur dhe gjithçka tregon se Kane do të vazhdojë të udhëheqë sulmin e Bayern Munichut edhe në vitet e ardhshme.