Dyshimet për korrupsion në Fushë-Kosovë, Prebreza e shkarkon drejtorin e arrestuar

Kryetari i Fushë-Kosovës, Valon Prebreza, ka njoftuar për shkarkimin e drejtorit të Pronës në këtë komunë, Gëzim Zogiani, i arrestuar në një aksion të organeve të rendit para pak ditësh, së bashku me katër zyrtarë të tjerë, nën dyshimin për korrupsion.

“Të nderuar qytetarë të Komunës së Fushë-Kosovës, Siç ju kam njoftuar në reagimin tim paraprak, sot kam marrë vendim për lirimin nga detyra të Drejtorit të Pronës, z. Gëzim Zogiani. Vendimi, të cilin po e bëj publik bashkë me këtë njoftim, është në përputhje me zotimin tim për një qeverisje transparente, të përgjegjshme dhe të pakompromis ndaj çdo dyshimi për keqpërdorim të detyrës zyrtare”, shkroi Prebreza në një postim në Facebook.

Ai tha se “ky veprim nuk paragjykon përgjegjësinë penale të askujt”.

“Përcaktimi i fajësisë u takon vetëm organeve kompetente të drejtësisë, punën e të cilave e respektojmë plotësisht. Komuna e Fushë Kosovës do të vazhdojë të bashkëpunojë pa rezervë me Prokurorinë dhe me çdo institucion tjetër përgjegjës për zbardhjen e plotë të kësaj çështjeje”, shkroi ai.

Prebreza tha se “në Komunën e Fushë-Kosovës nuk do të ketë mbrojtje politike për asnjë emër, pozitë ose interes, asgjë nuk do të vendoset mbi ligjin dhe besimin e qytetarëve”.

“Llogaridhënia fillon me veprime konkrete. Fjala e dhënë qytetarëve do të mbahet”, shkroi ai.