Kastrioti, kampion i Kosovës

Trofeu i kampionit kthehet në qytetin e hendbollit – në Ferizaj.

Kastrioti është kampion i Kosovës në hendboll në konkurrencë të meshkujve.

Në finale shumë interesante të plejofit, Kastrioti e mposhti Rahovecin me rezultatin 3:1.

Ndeshja vendimtare u zhvillua të dielën mbrëma në Rahovec. Pas një loje shumë dramatike, Kastrioti fitoi me rezultatin 25:23.

Kastrioti e ka fituar titullin e kampionit pas plot 15 vjetësh. Gjithsej i ka gjashtë tituj me këtë emër të klubit. Rahoveci i fitoi dy titujt e kaluar, por prej të dielës Kosova ka kampion të ri.

Portieri Wadi Chebbi ishte hero i finales për Kastriotin. Në fakt Chebbi ka shkëlqyer gjatë gjithë kampionatit dhe ishte mur i pakalueshëm edhe në finale. Ai bëri pritje të shumta, duke përfshirë një vendimtare në minutën e fundit.

Yassine Henahen ishte më efikasi te ferizajasit me shtatë gola. Pesë i shënoi Felippe Teixeira, kurse nga tri i realizuan Alban Haziri, Festim Mustafa e Albin Ahlin.

Ndeshje të madhe kishte edhe portieri i Rahovecit, Arti Luzha. Pritjet e tij po ashtu ishin të shumta. Egzon Gjuka dhe Guilherme Fernandes i realizuan nga pesë gola. Katër i kishte Mali Luzha.

Ferizajasit ishin në epërsi thuajse gjithë pjesën e parë. Epërsia e tyre shkoi deri në tri gola.

Rrjedha ishte e njëjtë edhe në pjesën e dytë. Kastrioti u shkëput deri në katër gola, 21:17. Por

“vreshtarët” luftarakë nuk u dorëzuan. Pas rezultatit 22:20 për mysafirët, Mali Luzha i realizoi dy gola rresht për të barazuar në 22:22 në minutën e 57-të.

Më pas Yassine Henahen shënoi për 23:22, kurse për 23:23 shënoi Ardit Tafilaj. Pasoi tjetri gol i Henahenit për 24:23 e më pas Chebbi bëri pritje vendimtare. Fare në fund, Alban Haziri shënoi për 25:23 dhe për festën e madhe të ferizajasve.

Kastrioti këtë edicion e ka fituar edhe Kupën e Kosovës.

Trofeun e kampionit, kapitenit të Kastriotit, Beni Sula ia dorëzoi presidenti i Federatës së Hendbollit të Kosovës, Edin Kolgeci.