Trumpi “hakmerret” edhe ndaj Merzit, SHBA-ja tërheq 5000 trupa nga Gjermania

Departamenti Amerikan i Mbrojtjes ka në plan të tërheqë rreth 5 mijë trupa nga Gjermania, në një moment tensionesh të shtuara mes presidentit Donald Trump dhe kancelarit gjerman Friedrich Merz lidhur me zhvillimet e fundit në luftën me Iranin.

Vendimi vjen vetëm një ditë pasi Trump kritikoi ashpër Merz, i cili deklaroi se Shtetet e Bashkuara ishin “poshtëruar” nga negociatorët iranianë. Në reagimet e tij në rrjetet sociale, Trump e cilësoi kancelarin gjerman si “duke bërë një punë të tmerrshme”, duke e akuzuar për dështime në politikat e emigracionit dhe energjisë, shkruan A2 CNN.

Zëdhënësi i Pentagonit, Sean Parnell, konfirmoi se urdhri për tërheqjen e trupave është dhënë nga sekretari i Mbrojtjes Pete Hegseth. Sipas tij, vendimi është marrë pas një rishikimi të pranisë ushtarake amerikane në Europë dhe pritet të zbatohet brenda 6 deri në 12 muajve të ardhshëm.

Aktualisht, SHBA ka mbi 36 mijë trupa aktive në Gjermani, duke e bërë atë praninë më të madhe ushtarake amerikane në Europë. Një pjesë e konsiderueshme e tyre është e vendosur në bazën ajrore Ramstein.

Trump ka sugjeruar gjithashtu mundësinë e tërheqjes së trupave nga Italia dhe Spanja, duke i kritikuar këto vende për mungesë mbështetjeje në operacionet për rihapjen e Ngushticës së Hormuzit. Ai ka qenë prej kohësh kritik ndaj aleancës së NATO dhe nivelit të kontributit të vendeve anëtare.

Në muajt e fundit, Gjermania ka rritur ndjeshëm shpenzimet për mbrojtjen, duke synuar të arrijë 3,1% të Prodhimit të Brendshëm Bruto deri në vitin 2027. Megjithatë, vendimi për tërheqjen e trupave ka ngjallur shqetësime, veçanërisht në Europën Lindore, ku vendet mbeten të ndjeshme ndaj kërcënimeve nga Rusia. /a2cnn