Spotify thyen rekord në vitin 2025: 11 miliardë dollarë të paguara për industrinë muzikore

Spotify ka shpërndarë edhe një herë një shumë rekord për industrinë muzikore gjatë vitit 2025, duke paguar 11 miliardë dollarë honorare, sipas një njoftimi të ri të kompanisë. Kjo shifër është 1 miliard dollarë më e lartë se viti i kaluar, duke shënuar vitin e dytë radhazi me rritje rekord.

Sipas Spotify-t, kjo përfaqëson pagesën më të madhe vjetore për muzikën nga çdo platformë apo shitës në histori. Që nga themelimi i saj në vitin 2006, kompania ka paguar gjithsej mbi 70 miliardë dollarë për artistët, shtëpitë diskografike dhe mbajtësit e të drejtave.

Në deklaratën e publikuar në blogun zyrtar të kompanisë, drejtuesi i sektorit muzikor në Spotify, Charlie Hellman, theksoi se edhe këtë vit artistët dhe shtëpitë diskografike të pavarura përbënin rreth gjysmën e të gjitha honorareve të shpërndara.

“Edhe një herë, artistët dhe etiketat e pavarura përbënin gjysmën e të gjitha pagesave,” u shpreh Hellman.

Ai shtoi se sot Spotify gjeneron rreth 30 për qind të të ardhurave globale nga muzika e regjistruar, duke u shndërruar në motorin kryesor të rritjes së industrisë muzikore.“Gjatë vitit të kaluar, pagesat tona u rritën me mbi 10 për qind, ndërsa burimet e tjera të të ardhurave të industrisë u rritën rreth 4 për qind. Kjo e bën Spotify-n shtytësin kryesor të rritjes së të ardhurave muzikore në vitin 2025,” theksoi ai.

Njoftimi vjen në një kohë kur debati për shpërndarjen e të ardhurave në platformat streaming vazhdon, por Spotify insiston se roli i saj mbetet kyç në zhvillimin dhe qëndrueshmërinë financiare të industrisë globale të muzikës./KultPlus