Durant kalon Wilt Chamberlainin në listën historike

Kevin Durant ka hyrë në histori duke kaluar Wilt Chamberlainin në listën e shënuesve më të mirë të të gjitha kohërave në NBA, por 30 pikët e tij nuk mjaftuan për t’i dhënë fitoren Houston Rockets ndaj Portland Trail Blazers.

Ndeshja e zhvilluar në Moda Center përfundoi me fitore 111-105 për skuadrën vendase.

Me këtë paraqitje, 37-vjeçari Durant ka arritur kuotën e 31,435 pikëve në karrierë, duke u ngjitur në vendin e shtatë në renditjen historike, ndërsa lista kryesohet nga LeBron James.

Pavarësisht arritjes personale, Rockets u larguan pa fitore nga Portlandi.

Në ndeshjet e tjera të natës në NBA, Milwaukee Bucks mposhtën Los Angeles Lakers 105-101 falë një fundi të fortë ndaj LeBron James, ndërsa Golden State Warriors dominuan Sacramento Kings me rezultat të thellë 137-103.

Oklahoma City Thunder realizuan një rikthim spektakolar, duke përmbysur një disavantazh prej 21 pikësh për të fituar 117-116 ndaj Memphis Grizzlies.