Arbër Selmani promovon “Testosteron”-in në Prishtinë më 5 dhjetor

Më 5 dhjetor, shkrimtari Arbër Selmani do të promovojë librin e tij më të ri, “Testosteron”, në Katin IV të Grand Hotel në Prishtinë. Ngjarja do të jetë një mbrëmje e hapur për të gjithë ata që duan të dëgjojnë lexime nga autori, pak muzikë, të blejnë librin dhe të bëhen pjesë e rrugëtimit të tij letrar.

“Testosteron”, tashmë fitues i dy çmimeve si dorëshkrim, vjen si libri i pestë i Selmanit dhe shënon një hap të rëndësishëm në krijimtarinë e tij. I ndërtuar përmes tregimeve dhe fragmenteve të ngarkuara me ndjeshmëri, intimitet dhe sinqeritet brutal, libri eksploron vetminë, trupin, marrëdhëniet dhe çfarë mbetet prej njeriut në momentet më të brishta, shkruan KultPlus.

Arbër Selmani është shkrimtar, gazetar dhe aktivist nga Prishtina, i njohur për stilin e tij të ndjeshëm dhe për mënyrën si i përzien përjetimet personale me realitetin shoqëror të brezit të tij. Librat dhe shkrimet e tij janë pritur me interes në Kosovë e më gjerë, duke e bërë atë një nga zërat më të veçantë të letërsisë së re shqipe.

Për lexuesit dhe admiruesit e letërsisë bashkëkohore, mbrëmja në Grand Hotel premton një atmosferë të ngrohtë, të gjallë dhe shumë personale pikërisht si shkrimet e Arbër Selmanit. Kjo ngjarje është një ftesë e hapur për këdo që dëshiron të jetë pjesë e kapitullit të ri të autorit dhe të udhëtimit të “Testosteron”-it. /kultolus