Për herë të parë në Gjilan mbahet Festivali i këngës folklorike

Gjilani bëhet nikoqiri i një ngjarjeje të rëndësishme kulturore mbarëkombëtare, teksa këtë vit organizohet Festivali i Këngës Folklorike, një aktivitet unik që për herë të parë mbledh artistë, këngëtarë solist nga trevat shqiptare në një skenë të vetme nën përcjelljen e orkestrës folklorike autentike gjilanase.

Festivali, i konceptuar si një folk festival me rrënjë tradicionale, vjen nën organizimin e OJQ Cello Duo, si një iniciativë e drejtoreshës Arzie Jusufi, në bashkëpunim të ngushtë me partnerin e saj profesional Fazli Berisha si ideator për nismën e këtij festivali për qytetin e Gjilanit dhe udhëheqësi artistik instrumentalisti Afrim Leka.

Festivali i Këngës Folklorike në Gjilan do të jetë një festë të kulturës shqiptare me standarde të reja artistike.

Qëllim kryesor i festivalit është ruajtja dhe promovimi i këngës folklorike shqiptare në të gjitha format e saj tradicionale,krijimi i një platforme për artistët e rinj dhe solistët folklorike duke i ofruar publikut një përvojë autentike artistike,si dhe vendosja e Gjilanit në hartën kulturore mbarëkombëtare me një aktivitet vjetor të qëndrueshëm.