Prapë s’ka minuta për Zhegrovën, Juventusi fiton ndaj Cagliarit falë Kenan Yildiz

Juventusi e ka fituar përballjen me Cagliarin në kuadër të xhiros së 13-të në Serie A.

Heroi i “Bianconerëve” ishte Kenan Yildiz, i cili shënoi dygolësh në fitoren 2-1, ndërsa trajneri Luciano Spalletti sërish e la në stol Edon Zhegrovën, duke mos i dhënë asnjë minutë.

Cagliari realizoi një aksion të shkëlqyer, me Sebasitaino Espositon që shënoi nga afërsia pas asistimit të Palestra për ta zhbllokuar rezultatin (26’).

Sidoqoftë, qysh në aksionin tjetër - Kenan Yildiz me një goditje të fuqishme e barazoi rezultatin (27’).

Turku ishte sërish në qendër të vëmendjes kur u përkujdes për ta përmbysur rezultatin pas asistimit të Pierre Kalulu (45+1’).

Në pjesën e dytë, Juventusi prapë kishte rastet më të mira kur tentoi përmes Conceicaos dhe Koopmeiners por prapë larg finalizimit.

Befasia më e madhe ishte padyshim sërish lënia në stol e Zhegrovës, i cili para pak ditëve zhvilloi paraqitje solide për Juventusin në Ligën e Kampionëve.

Pas kësaj fitore, Juventus ngjitët në pozitën e shtatë me 23 pikë ndërsa Cagliari zë pozitën e 14-të me 11 sosh.