Kryeministri australian, Albanese martohet në moshën 62 vjeçare

Kryeministri i Australisë, Anthony Albanese, është martuar me partneren e tij, Jodie Haydon, duke u bërë kështu kryeministri i parë në historinë e vendit që kurorëzon martesën ndërsa është në detyrë.

Çifti i dha fund beqarisë të shtunën pasdite në Kanberra – vetëm një ditë pas seancës së fundit parlamentare për këtë vit, shkruan BBC.

“Jemi jashtëzakonisht të lumtur që ndamë dashurinë dhe zotimin tonë për të kaluar jetën së bashku, përpara familjes dhe miqve tanë më të afërt,” deklaroi Albanese në një njoftim të shkurtër.

Çifti u fejua Ditën e Shën Valentinit vitin e kaluar. Propozimi dhe pritja e dasmës u zhvilluan në rezidencën zyrtare të kryeministrit, “The Lodge”.

Për shkak të shqetësimeve për sigurinë dhe mundësinë e ndërhyrjeve të padëshiruara, planet e dasmës janë mbajtur të fshehta deri në ditën e madhe.

Në ceremoni morën pjesë prindërit e znj. Haydon, si dhe djali i Albaneses nga martesa e parë. Edhe qeni i kryeministrit, Toto, pati rol të veçantë – ai ishte mbajtësi i unazave. Çifti u largua nga altari nën tingujt e këngës së Stevie Wonder, “Signed, Sealed, Delivered (I’m Yours)”.

Kryeministri ndau gjithashtu një video në rrjetet sociale, ku shihej duke ecur i lumtur me nusen ndërsa mysafirët i hidhnin konfeti.

Disa ministra të kabinetit të tij ishin të pranishëm në ceremoni.

Gjatë pritjes, vallëzimi i tyre i parë ishte nën tingujt e “The Way You Look Tonight” nga Frank Sinatra.

Në festë u përdorën edhe kanaçe birre të personalizuara, të printuara me fotografinë e çiftit që ishte përdorur për të njoftuar fejesën.

Çifti do të kalojë muajin e mjaltit në Australi, duke filluar nga e hëna deri të premten e ardhshme – plane të thjeshtuara pas rizgjedhjes së Albaneses në maj.

Albanese, 62 vjeç, dhe Haydon, 47 vjeçe, u takuan për herë të parë në një darkë biznesi në Melburn, në vitin 2020, kohë kur ai ishte lider i opozitës.

Znj. Haydon e ka shoqëruar kryeministrin gjatë fushatave zgjedhore të viteve 2022 dhe 2025, si dhe në ngjarje të rëndësishme ndërkombëtare, përfshirë funeralin e Mbretëreshës Elizabeth II dhe darkën shtetërore të organizuar nga ish-presidenti amerikan Joe Biden.

Albanese ka hyrë tashmë në historinë australiane si kryeministri i parë që fejohet – e tani edhe martohet – gjatë mandatit.

Në deklaratën e tyre të përbashkët pas fejesës, ata kishin thënë: “Jemi me të vërtetë me fat që e kemi gjetur njëri-tjetrin”.