Janina Ymeri i bashkohet LDK-së, garon për deputete

Kryetari i LDK-së, Lumir Abdixhiku, ka njoftuar përfshirjen e Janina Ymerit në listën zgjedhore të partisë për zgjedhjet e 28 dhjetorit, duke e cilësuar atë si shembullin më të plotë të aktivistes politike të kohës sonë.

Sipas Abdixhikut, Janina Ymeri është shndërruar ditëve të fundit në një prej figurave më autentike të angazhimit qytetar, pas denoncimit të skandalit të madh në sektorin energjetik, i cili lidhet me transferimin e miliona eurove të qytetarëve të Kosovës në llogaritë e biznesmenit serb Vuk Hamovië, djalit të ish-shefit të Armatës Jugosllave, Rade Hamovië.

Abdixhiku thekson se përmes këtij rasti, Ymeri ka ekspozuar qartë mashtrimin popullist që, sipas tij, karakterizon pushtetin aktual. “Vukvendosje”, siç e quajti ajo me ironi, ilustron – sipas kryetarit të LDK-së – një realitet ku njëra dorë shtrihet drejt mafias energjetike, ndërsa tjetra drejtohet me akuza ndaj patriotëve të vendit. “Kështu duket trushpëlarja”, shkroi ai.

Janina, duke vepruar e vetme dhe pa mbështetje institucionale, ngriti zërin, kërkoi llogari dhe dokumentoi me fakte lidhjet korruptive brenda sektorit energjetik që, sipas saj, po kapnin institucionet shtetërore. “Pa frikë, pa hezitim, pa kalkulim”, e përshkroi Abdixhiku.

Ai shtoi se Janina Ymeri mishëron tipologjinë e aktivistes së re politike: të guximshme, të pakorruptueshme nga propaganda dhe të patrembur nga pushteti. Ajo vjen në politikë nga beteja e së vërtetës, nga lufta kundër korrupsionit dhe nga përkushtimi i sinqertë për interesin publik.

Kreu i LDK-së theksoi se partia e tij është shtëpia natyrale e njerëzve të ndershëm, profesionistëve dhe atyre që e shohin politikën si mjet për të shërbyer vendin, e jo përfitimet personale.

Në fund, Abdixhiku u shpreh i lumtur që Janina Ymeri do të jetë pjesë e listës së LDK-së për zgjedhjet e 28 dhjetorit, duke nënvizuar se tani është koha që integriteti i saj të përfaqësohet në Kuvend: “Ajo ka treguar se si duket aktivisti i vërtetë – me fakte, me integritet dhe me vizion për një shtet ligjor.”/Zëri