“Të lutem, kthehu”, vazhdojnë kërkimet për influencerën e zhdukur në Graz

“Stefi, të lutem kthehu”, është mesazhi i lënë nga nëna e 32-vjeçares austriake të zhdukur në derën e apartamentit të saj në Graz.

Kërkimi për Stefanie Pieper, ku përfshihen hetues sllovenë dhe austriakë të vendit të ngjarjes, ka vazhduar që nga e diela, por pavarësisht një hetimi intensiv, ende nuk ka asnjë gjurmë të grimieres dhe influencueses së zhdukur, shkruan 24ur, transmeton Klankosova.tv

Stefanie u zhduk në mënyrë misterioze pasi u kthye nga një festë në një klub në qendër të Gracit. Dyshohet se i dërgoi një mesazh kolegut të saj se kishte mbërritur shëndoshë e mirë në shtëpi, pas së cilës u zhduk.

Zhdukja e saj u vu re për herë të parë nga një fotograf me të cilin kishte një takim për një set fotografik atë pasdite. Kur ajo nuk iu përgjigj thirrjeve të tij, ai njoftoi policinë. Ish-partneri i saj, një shtetas slloven 31-vjeçar, u arrestua të hënën.

Edhe familjarët e të dyshuarit u arrestuan

Dy persona të tjerë u arrestuan shpejt. “Sipas informacioneve të fundit, ne kemi arrestuar dhe marrë në pyetje dy persona të tjerë nga familja e të dyshuarit. Ata janë gjithashtu shtetas sllovenë, të cilët tani po merren në pyetje”, konfirmoi për 24ur Fritz Grundnig nga policia provinciale austriake e Steiermark-ut. Ata thuhet se janë njerku 57-vjeçar dhe vëllai 28-vjeçar i të dyshuarit kryesor.

Ndërkohë, një numër raportesh të pakonfirmuara po qarkullojnë në domenin publik. Gazeta austriake Kronen Zeitung raportoi se një fqinj i tha policisë se pa një të dyshuar në shkallët e ndërtesës dhe se më parë nga apartamenti ishin dëgjuar britma dhe një grindje.