Policia e shpall në kërkim të riun nga Peja, i dyshuar për disa vepra penale

Policia e Kosovës e ka shpallur në kërkim një të ri nga Peja, i cili dyshohet për disa vepra penale.

I kërkuari është Valtrim (Shefqet) Kelmendi, i cili dyshohet për mbajtja në pronësi, kontroll ose posedim të paautorizuar të armëve, lëndim i lehtë trupor dhe kanosje, transmeton Zeri.info.

Policia ka publikuar edhe foton e të kërkuarit, ndërsa ka kërkuar bashkëpunim me qytetarë për arrestimin e tij.

Po ashtu, Policia ka njoftuar se për rastin e njëjtë, tashmë dy nga të shpallurit në kërkim janë dorëzuar në Polici.

Njoftimi i plotë nga Policia:

Pejë, 18 nëntor 2025

Policia e Kosovës – Drejtoria Rajonale e Policisë në Pejë, duke u bazuar në Ligjin për publikimin e fotos me shënime të personave të kërkuar dhe me autorizim të Prokurorisë Themelore në Pejë, me qëllim lokalizimin dhe arrestimin e personave të shpallur në kërkim, lëshon këtë:

Kërkesë për bashkëpunim me qytetarët

Ju njoftojmë se dy prej personave të shpallur në kërkim:

Ismet (Rexhep) Kelmendi, i lindur më 09.09.2005 në Pejë.

Premton (Megjid) Berisha, i lindur më 11.09.2005 në Pejë.

Janë dorëzuar në Polici dhe nuk figurojnë më si persona në kërkim.

Aktualisht, në kërkim nga Policia e Kosovës mbetet:

Valtrim (Shefqet) Kelmendi, i lindur më 28.02.2005, në Pejë.

I dyshuari kërkohet për këto vepra penale: “Mbajtja në pronësi, kontroll apo posedim të paautorizuar të armëve”, “Lëndim i lehtë trupor” dhe “Kanosje”.

Policia e Kosovës kërkon nga qytetarët e Republikës së Kosovës që kushdo që ka informacion mbi vendndodhjen e personit të lartpërmendur të kontaktojë menjëherë Policinë e Kosovës ose stacionin më të afërt policor.

Numrat e telefonit dhe adresat kontaktuese:

192 dhe 0800 19999 (pa pagesë)

039 432 327 – Drejtoria Rajonale Pejë.

E-mail: info@kosovopolice.com