Lladrovci përkrah protestën në Strasburg: E vërteta jonë le të jetë e dukshme dhe e zëshme

Protesta e ftuar nga OVL UÇK-ja ndaj gjykimit të ish-krerëve të UÇK-së ka marrë përkrahje edhe nga Ramiz Lladrovci.

Ai tha se “e vërteta jonë le të jetë e dukshme dhe e zëshme në Strasburg, le të jetë zë për drejtësinë ndërkombëtare”.

Postimi i plotë i tij, në përkrahje të protestës:

Protesta e ftuar nga OVL UÇK-ja më 16 nëntor në Strasburg, kundër padrejtësisë ndaj ish-krerëve të UÇK-së, është protestë edhe ndaj padrejtësisë që po i bëhet Kosovës, qytetarëve të saj dhe vet lirisë tonë.

Unë i bashkohem protestës, njëherësh ftoj të gjithë atdhetarët që kanë mundësi, më 16 nëntor të jenë të pranishëm në Strasburg, në mënyrë simbolike të përcjellim mesazhin tonë se qëndrojmë fort pranë liderëve tanë të luftës dhe paqes, me Hashimin, Kadriun, Jakupin, Rexhën dhe të tjerët.

Liria ishte motivi madhor i veprës së tyre. Çlirimi ishte rrugë e vetme për të arritur te liria, ishte rrugë të cilën e ndoqëm me aleatët, në pajtim me normat ndërkombëtare, andaj, akuzat janë pjesë e skenarit serbo-rus dhe nuk mund të jenë argument i përndjekjes për liderët tanë.

Shihemi në Strasburg, për të dëshmuar se liderët tanë të luftës dhe paqes, kurrë nuk janë vetëm. E vërteta jonë lë të jetë e dukshme dhe e zëshme në Strasburg, lë të jetë zë për drejtësinë ndërkombëtare. UÇK-ja ishte shpirti i një populli, krenari e një kombi!