Kurani më i madh në botë i shkruar me dorë, siriani sfidon edhe sëmundjen për ta përfunduar

Ali Zaman, i cili u zhvendos në Stamboll me familjen e tij në vitin 2017 ndërsa punonte si argjendar në Irak, kaloi gjashtë vjet duke shkruar Kuranin më të madh të shkruar me dorë në botë, 4 metra i gjatë dhe 1.5 metra i gjerë.

I lindur në vitin 1971 në lagjen Raniye të provincës Suleymaniyeh, Zaman zhvilloi një interes për kaligrafinë që në moshë të re.

Ai filloi të studionte kaligrafinë ndërsa ndiqte shkollën e mesme dhe e braktisi karrierën e tij si argjendar në vitin 2013, duke e përqafuar plotësisht kaligrafinë.

Në maj të vitit 2017, ai dhe familja e tij u zhvendosën në lagjen Fatih të Stambollit për të zhvilluar më tej artin.

Ali Zaman e filloi projektin e tij një vit para se të mbërrinte në Stamboll, një Kuran me 30 faqe me përmasa 210 me 150 centimetra dhe e përfundoi atë tre vjet më vonë në vitin 2019.

Pastaj, duke nisur projektin e tij të ri, Aliu kaloi një vit duke kërkuar, përcaktuar dimensionet dhe duke siguruar materiale.

Në mesin e vitit 2020, Zaman ia paraqiti dizajnin e projektit mësuesit të tij, Bijar Erbili, dhe mori miratimin e tij para se të niste projektin "Kurani më i madh në botë me dorëshkrim".

Bëhet e ditur se Zaman shmangu mjetet moderne gjatë shkrimit të Kuranit. Ai shkroi çdo shkronjë duke përdorur stilolapsa tradicionalë.

Për gjashtë vjet, Zaman e kalonte ditën në tavolinën e tij të shkrimit në një dhomë në oborrin e xhamisë Mihrimah Sultan në Fatih pas namazit të mëngjesit, duke bërë pushime vetëm për vakte dhe lutje.

Duke punuar me durim mbi të njëjtën shkronjë, ndonjëherë për orë të tëra, gjatë ditëve të javës dhe fundjavave, artisti shkroi me kujdes çdo varg.

Por, problemet shëndetësore të Zaman, të cilat filluan në fund të vitit 2019, u përkeqësuan.

Për shkak të sëmundjeve, ai u detyrua të ndërpresë punën e tij në tetor 2023. Zaman ra shumë në peshë – nga 83 në 58 kilogram.

Megjithatë, kaligrafi i cili nuk mori mbështetje të jashtme dhe i mbuloi vetë të gjitha shpenzimet e projektit, nuk u dorëzua pavarësisht sfidave me të cilat u përball.

Puna gjashtëvjeçare e Zaman, e cila filloi në një dhomë të vogël në Fatih dhe vazhdoi pavarësisht sëmundjes dhe lodhjes, dha fryte.

Kështu, doli dorëshkrimi më i madh në botë i Kuranit.

I konsideruar si një nga kaligrafët më të shquar në botë, Zaman fitoi çmimet e para në garat e kaligrafisë "celi thuluth" dhe "nesih" të mbajtura në Siri në vitin 2007, Malajzi në vitin 2014, Irak në vitin 2015 dhe Turqi në vitin 2019.

Ai gjithashtu mori çmim në Konkursin Ndërkombëtar Hilye-i Sherif 2017 në Turqi, nga presidenti Recep Tayyip Erdogan.

Zaman tha se sapo merr një laps në dorë ndihet i lidhur me artin, se gjithçka buron nga shpirti dhe se si vetë vepra, ashtu edhe shkrimi janë me rëndësi të madhe.

Ai deklaroi se veçantia e një vepre sjell gëzim.

"Të jesh në gjendje të krijosh një vepër që pak njerëz mund ta bëjnë, ose të krijosh një vepër që pak njerëz duan ta bëjnë... Kjo është diçka që më bën të lumtur dhe krenar." /AA