Vrasja e gjyqtarit Kalaja, Gjykata e Tiranës lë në burg autorin, xhaxhanë dhe rojën

Gjykata e Tiranës ka vendosur masën e sigurisë “arrest me burg” për Elvis Shkambin, autorin e vrasjes së gjyqtarit të Apelit, Astrit Kalaja, për xhaxhanë e tij Gjon Shkambi dhe rojën e sigurisë që ndodhej në detyrë në momentin e ngjarjes.

Gjatë seancës avokati i të pandehurit Elvis Shkambi deklaroi se “klienti i tij i ka kërkuar falje publike familjes së gjyqtarit”, duke pretenduar se krimi ndodhi si pasojë e tronditjes psikike pas një “kalvari të gjatë gjyqesh”, ku institucionet “nuk kishin bërë detyrën”.

Sipas Prokurorisë, Elvis Shkambi akuzohet për “vrasje të funksionarëve publikë” dhe “vrasje në rrethana të tjera cilësuese, e mbetur në tentativë”, ndërsa xhaxhai i tij, Gjon Shkambi, për nxitje dhe bashkëpunim në tentativën për vrasje të Rakip dhe Elvis Kurtajt, palë kundërshtare në procesin gjyqësor.

Prokuroria thekson se xhaxhai ka shtyrë nipin të qëllojë edhe mbi babë e bir, pasi kishte vrarë gjyqtarin Kalaja.

Ndërkohë, punonjësi i sigurisë, Banush Koxhaj, akuzohet për shpërdorim detyre. Sipas prokurorisë, ai nuk ka reaguar edhe pse detektorët sinjalizuan praninë e metaleve gjatë hyrjes së Elvis dhe Gjon Shkambit në ambientet e gjykatës.