Bajrami: Kurti s’i ka numrat për Qeveri, po mban peng vendin me bllokadë politike

Deputetja e LDK-së, Hykmete Bajrami, ka akuzuar kryeministrin në detyrë, Albin Kurti, për bllokimin e qëllimshëm të procesit të konstituimit të Kuvendit, duke theksuar se arsyeja kryesore është mungesa e shumicës për formimin e Qeverisë.

“Ju e keni parë tentativën, e shohim të gjithë qartë: kush është bllokuesi. Sot, pas kaq shumë ditësh prej zgjedhjeve të 9 shkurtit, jemi ende në një situatë ku institucionet janë të pakonstituuara. Është e qartë që Albin Kurti nuk i ka numrat për të formuar Qeverinë, dhe kjo është arsyeja pse ai po vazhdon me një bllokadë të tillë që po e mban peng të gjithë vendin,” u shpreh Bajrami pas seancës konstituive.

Ajo theksoi se LDK-ja ka refuzuar të marrë pjesë në votimin e ndarë për nënkryetarët, duke u mbështetur në vendimin e fundit të Gjykatës Kushtetuese.

“Lidhja Demokratike e Kosovës, siç e dini, që nga dita e parë ka refuzuar të marrë pjesë në votimin ndaras, për arsye se është e qartë, tashmë edhe në pikën 4 të vendimit të fundit të Gjykatës Kushtetuese, ku ne urdhërohemi të vazhdojmë me konstituimin e Kuvendit sipas agjendës së dakorduar më 8 prill, ku kanë qenë të përfaqësuara të gjitha partitë parlamentare. Takimi ishte thirrur nga ish-kryetari i Kuvendit, z. Glauk Konjufca, dhe kishte një agjendë të dakorduar,” tha ajo.

Bajrami shtoi se ekziston edhe procesverbali i asaj mbledhjeje, ku është rënë dakord që votimi i nënkryetarëve të bëhet në pako dhe në mënyrë të hapur – diçka që është konfirmuar edhe nga Gjykata Kushtetuese në dy vendime të njëpasnjëshme.