Albanologet bullgare vlerësojnë Seminarin e Gjuhës Shqipe si përvojë unike

Sot mbyllet edicioni i radhës i Seminarit Ndërkombëtar për Gjuhën, Letërsinë dhe Kulturën Shqiptare.

Dy albanologe nga Bullgaria, Ekatarina Tarpomanova dhe Rusana Hrystova Beyleri ndanë emocionet dhe përvojën e tyre nga pjesëmarrja në këtë seminar.

Ekatarina Tarpomanova Albanologe dhe prodekane në Universitetin e Sofjes tha se ky seminar është një ngjarje vërtetë e rëndësishme për albanologët.

“Këtu kemi mundësi të takojmë kolegë, të shkëmbejmë ide jo vetëm për shkencën, por edhe për mënyrën se si zhvillohet gjuha. Për të rinjtë është një përvojë edhe më e vlefshme, sepse mësojnë gjuhën nga vetë folësit amtarë. Kontakti i drejtpërdrejtë me gjuhën dhe kulturën është i pazëvendësueshëm. Edhe sivjet kishte ligjërata shumë të rëndësishme që më ndihmojnë në punën time si gjuhëtare”, tha ajo.

Ndërsa Rusana Hrystova Beyleri albanologe tha se ky seminar është unik në shumë aspekte.

“Edhe pse brezat organizues kanë ndryshuar, fryma e mikpritjes dhe përkushtimi ndaj gjuhës shqipe mbetet i pandryshuar. Çdo vit sjell përvoja të reja, ndryshe dhe të veçanta. Ka seminare të ndryshme për gjuhë të ndryshme në vende të ndryshme, por këtu ndihesh pjesë e diçkaje më të madhe, një përjetim që nuk përshkruhet lehtë”, tha ajo.

Hrystova Beyleri tha se edhe këtë vit organizimi ishte jashtëzakonisht i mirë dhe është për t’u vlerësuar kontributi i shtetit të Kosovës, që e mbështet dhe promovon gjuhën shqipe në mënyrë dinjitoze.

Seminari i Gjuhës Shqipe ka nisur më 18 gusht në Prishtinë, derisa pjesë e programit kanë qenë kurse të gjuhës shqipe për pjesëmarrësit e huaj, ligjërata, referime dhe tryeza e sesione shkencore.

Temat boshte të seminarit  janë fokusuar në zhvillimet aktuale, qoftë në leksik, në ndikimin apo përdorimin e shqipes në rrjetet sociale dhe në postmodernizmin në letërsinë shqipe. /rtk