Supremja hedh poshtë ankesën e LVV-së kundër vendimit të PZAP-it për certifikimin e Listës Serbe

Gjykata Supreme ka hedhur poshtë si të palejuar ankesën e parashtruar nga anëtarët e Komisionit Qendror të Zgjedhjeve, Sami Kurteshi dhe Alban Krasniqi, kundër vendimit të Panelit Zgjedhor për Ankesa dhe Parashtresa (PZAP) A. nr. 3/2025, të datës 23 gusht 2025.

Me vendimin e PZAP-it të datës 23 gusht ishte aprovuar ankesa e subjektit politik Lista Serbe, duke urdhëruar KQZ-në që të certifikojë këtë subjekt me listën e kandidatëve për Asamble Komunale dhe për kryetar komune për zgjedhjet lokale të 12 tetorit, transmeton Klankosova.tv.

Kurteshi dhe Krasniqi kishin kërkuar nga Gjykata Supreme dy ditë më parë anulimin e vendimit të PZAP-it dhe rikthimin në fuqi të vendimit të KQZ-së për moscertifikimin e Listës Serbe.