Çeku: E njoh Prishtinën më mirë se vendin ku kam lindur

Ministri në detyrë i Kulturës, Rinisë dhe Sportit, Hajrulla Çeku, njëherësh kandidat për kryetar të Prishtinës, ka komentuar diskutimet publike se votuesit e kryeqytetit nuk e mbështesin një kandidat që nuk ka lindur në Prishtinë. Çeku, i lindur në Prizren, tha se kjo qasje është e padrejtë dhe e motivuar politikisht.

“Nëse çështja është kjo, atëherë një numër i kandidatëve që kanë kandiduar më herët nuk kanë lindur në Prishtinë, por kanë ardhur më pas. Kjo nuk po aplikohet me të tjerët, është një lloj standardi që po aplikohet vetëm me mua. Kjo tregon që nuk është genuine, është e sforcuar, është politike. Është normale, pjesë e fushatës, dhe nuk e marr shumë seriozisht”, tha Çeku në emisionin “Herët” në Tevë1.

Ai theksoi se Prishtina është një qytet i hapur dhe mikpritës, ku shumica e banorëve aktualë nuk kanë lindur në kryeqytet, por kanë kontribuuar në zhvillimin e tij.
“Prishtina është shumë më e hapur dhe mikpritëse sesa kjo që po bëhet tani. Një pjesë e madhe e banorëve të Prishtinës nuk kanë lindur në Prishtinë, por kanë ardhur dhe krejt çka kanë arritur, e kanë arritur këtu. Jetën e kanë ndërtuar në Prishtinë”, u shpreh ai.

Çeku shtoi se më e rëndësishme sesa vendlindja është njohja reale e qytetit dhe dashuria për të.
“Në raport me detyrën e kryetarit, unë besoj që qytetin duhet me e njoft, me e dashtë, e pastaj me i ofru zgjidhje. Kryetari aktual nuk ka jetuar në Prishtinë, unë kam jetuar më gjatë. Jam ballafaquar dhe i njoh shumë mirë problemet e Prishtinës, sepse pjesën më të madhe të jetës e kam kaluar këtu. E njoh më mirë Prishtinën se sa vendin tim të lindjes”, deklaroi Çeku.

Sipas tij, përvoja personale dhe përkushtimi ndaj qytetit kanë më shumë peshë sesa origjina e kandidatit.