Shitjet e Teslës në Europë bien me 40%, trefishohen regjistrimet e rivalit kinez BYD
Shitjet e Teslës ranë me 40% në mbarë Europën në korrik krahasuar me një vit më parë, teksa kompania e makinave elektrike e Elon Musk po përballet me konkurrencë gjithnjë e më të fortë nga rivali kinez BYD.
Në BE, Shoqatën Evropiane të Prodhuesve të Automjeteve (ACEA), Shoqatën Evropiane të Tregtisë së Lirë dhe Mbretërinë e Bashkuar u regjistruan muajin e kaluar 8 mijë e 837 shitje makinash Tesla, nga 14 mijë e 769 në të njëjtën periudhë të vitit të kaluar.
Regjistrimet e makinave të reja të BYD në gjithë Europën u rritën në 13 mijë e 503 muajin e kaluar, nga 4 mijë e 151 një vit më parë. BYD tani ka 1.2% të tregut, sipas ACEA. Pjesa e Teslës mbetet 0.8%.
Markat kineze të makinave, të cilat shpesh ofrojnë modele relativisht më të lira, po zgjerojnë ndjeshëm praninë e tyre në Europë. BYD e kaloi Teslën në shitje për herë të parë këtë pranverë, sipas një raporti nga kompania e kërkimit të tregut JATO Dynamics.
Në Mbretërinë e Bashkuar, qeveria tha të enjten se marka amerikane Ford do të jetë prodhuesja e parë që do të marrë subvencionin maksimal prej 3 mijë e 750 paund për dy modele: Gen-E dhe e-Tourneo Courier. Edhe 26 modele të tjera do të përfitojnë nga grante prej 1 mijë e 500 paund sipas skemës së re të granteve për makinat elektrike.
Grantet vlejnë vetëm për automjete me një çmim liste prej 37 mijë paund ose më pak, dhe zbritja aplikohet automatikisht në momentin e blerjes.
Sekretarja e Transportit, Heidi Alexander, tha: “Po u kthejmë njerëzve para në xhepa dhe po e bëjmë më të lehtë e më të lirë për familjet kalimin në elektrike, duke ofruar zbritje deri në 3 mijë e 750 paund për makinat elektrike. Masat tona po nxisin konkurrencën në tregun britanik të makinave elektrike, po rrisin ekonominë dhe po mbështesin vendet e punës dhe aftësitë, si pjesë e planit tonë për ndryshim.”
Ndërkohë, Shoqata e Prodhuesve dhe Tregtarëve të Automjeteve tha se prodhimi i makinave në Mbretërinë e Bashkuar u rrit për muajin e dytë radhazi në korrik, me 5.6%.
Megjithatë, drejtori ekzekutiv i SMMT, Mike Hawes, tha se tregu po kalon një periudhë të turbullt, me “besimin e konsumatorit të dobët, flukset tregtare të paqëndrueshme dhe investime masive në teknologji të reja si brenda vendit ashtu edhe jashtë”.
ACEA raportoi gjithashtu se në shtatë muajt e parë të vitit 2025, u regjistruan 1 milion e 11 mijë makina të reja plotësisht elektrike, që përbëjnë 15.6% të tregut të BE-së.
Makinat hibride-elektrike rezultuan më popullore, me 2 milion 255 mijë njësi të shitura në BE deri tani këtë vit. Rritja u nxor nga zgjerimi në katër tregjet më të mëdha: Francë, +30.5%, Spanjë, +30.2%, Gjermani, +10.7% dhe Itali, +9.4%.
Sigrid de Vries, drejtoreshë e përgjithshme e ACEA, tha se për të përshpejtuar adoptimin, Europa “duhet të vazhdojë të zgjerojë infrastrukturën publike të karikimit, të sigurojë çmime më të ulëta të karikimit dhe të garantojë skema të mirë-koordinuara të stimujve për blerje”.