Arrestohet 19-vjeçari në Fier, kërkohet nga Italia për trafikim droge

Policia e Shtetit ka bërë të ditur se e ka arrestuar një 19 vjeçar në Fier, pasi është i akuzuar nga Italia për pjesëmarrje në organizatë kriminale që trafikonte lëndë narkotike.

Në një njoftim për media thuhet se i dyshuari është kapur në Fier, në kuadër të aksionit “Operacionalja 59”.

“Gjatë këtij operacioni, u kap në Fier dhe u arrestua me qëllim ekstradimin në Itali, shtetasi Z. Z., 19 vjeç, lindur dhe banues në fshatin Cukalat, Berat”.

“Ky shtetas ishte shpallur në kërkim ndërkombëtar nga Interpol Roma, pasi Gjykata e Riminit i ka caktuar masën e sigurisë “Arrest në burg”, për pjesëmarrje në organizatë kriminale që trafikonte lëndë narkotike. Maksimumi i dënimit është 10 vjet burgim”, thuhet në njoftim.

Interpol Tirana vijon procedurat, në bashkëpunim me autoritetet italiane, për ekstradimin e këtij shtetasi.