Shkëndija pa sulmuesin Ademi ndaj Ludogoretsit

Skuadra e Shkëndijës në dy ndeshjet e “play-off”-it të Ligës së Evropës kundër Ludogorets do të jetë e hendikepuar në repartin ofensiv.

Sulmuesi i ri, Fiton Ademi, pësoi një lëndim në nyjën e këmbës fundjavën e kaluar gjatë fitores ndaj Makedonija Gj. P.

Parashikohet që pushimi i tij të zgjasë të paktën dhjetë ditë, ndaj trajneri Jeton Beqiri do të ketë një opsion më pak në sulm.

Edhe pse Ademi nuk është titullar i rregullt, ai shihet si një alternativë e mirë për rotacionin. Megjithatë, është e sigurt se sulmuesi i ri dhe i talentuar do të mungojë në duelin e nesërm me Ludogoretsin, si dhe në ndeshjen e radhës kundër Arsimit.

Te Shkëndija, megjithatë, ekziston optimizëm se Fiton Ademi do ta tejkalojë me kohë dëmtimin, në mënyrë që të jetë në dispozicion për ndeshjen e kthimit kundër Ludogoretsit në Razgrad. /Telegrafi