Granit Xhaka përballet me sfidën më të madhe të karrierës te Sunderland

Të shtunën, Granit Xhaka nis sezonin e tij të 15-të si futbollist profesionist – por këtë herë me një risi të pakëndshme.

Me fanellën e Sunderland, kapiteni i kombëtares së Zvicrës pritet të luftojë për mbijetesë në Ligën Premier për herë të parë në karrierë, pasi ai deri tani ka luftuar me klube të forta për pozitat e larta.

Nga Liga e Kampionëve te beteja për mbijetesë

Transferimi i Xhakës nga Bayer Leverkusen te Sunderland ishte surprizues. Pas dy sezones të suksesshëm në Gjermani, ku fitoi kampionatin dhe kupën, ai do të kishte luajtur në Ligën e Kampionëve.

Megjithatë, në vend të kësaj, ai zgjodhi një projekt të ri në Angli – një skuadër që sipas statistikave dhe parashikimeve të basteve renditet e fundit për sezonin e ri.

Në dy vitet e fundit, të tre skuadrat e sapo-promovuara në Ligën Premier kanë rënë menjëherë përsëri në Championship. Analistët presin një skenar të ngjashëm edhe këtë vit, me Sunderland të vendosur gati unanimisht në vendin e 20-të.

Kapiten edhe te “Macet e Zeza”

Në moshën 32-vjeçare, Xhaka po nis një sfidë të re. Në karrierën e tij me Basel, Borussia Mönchengladbach, Arsenal dhe Bayer Leverkusen, vendi më i ulët i arritur ka qenë i teti.

Tani, ai duhet të udhëheqë një skuadër të re e me pak përvojë për të mbijetuar mes më të mirëve të Anglisë.

“E dua sfidën. Ndoshta kjo është më e madhja e karrierës sime”, deklaroi Xhaka pas nënshkrimit të kontratës trevjeçare.

Përveçse lojtari më me përvojë, ai është emëruar edhe kapiten i Sunderland, duke u bërë lider i një ekipi që mbështetet shumë te mentaliteti i tij luftarak.

Një qytet me histori, por pa shkëlqim

Sunderland është pjesë e brezit industrial të veriut të Anglisë. Dikur “kryeqyteti botëror i ndërtimit të anijeve”, por qyteti ka humbur industrinë e tij kryesore që prej vitit 1988, duke kaluar periudha të vështira ekonomike. Turistët rrallëherë shkelin aty, por pasioni për “Black Cats” mbetet i madh.

Klubi ka gjashtë tituj kampion dhe një FA Cup (1973) në histori, por vitet e fundit ka përjetuar rënie të shumta, madje deri në ligën e tretë.

Situata ka ndryshuar disi që kur miliarderi zviceran Kyril Louis-Dreyfus u bë pronar në vitin 2021, duke e rikthyer klubin fillimisht në Championship dhe tani në Ligën Premier.

Fillimi vendimtar

Sunderland debuton këtë të shtunë në shtëpi kundër West Ham, ndërsa një javë më pas përballet në transfertë me Burnley – një tjetër skuadër që pritet të luftojë për mbijetesë.

Në sezonin e fundit në Ligën Premier (2016/17), Sunderland mori vetëm dy pikë në 10 ndeshjet e para. Një nisje e tillë këtë vit do të ishte fatale dhe mund të përsëriste historinë e rënies së tyre në Championship. /telegrafi