Cakolli: Tërheqja e kërkesës nga Osmani s’e ndalon Kushtetuesen ta trajtojë çështjen

Eugen Cakolli nga Instituti Demokratik i Kosovës (KDI) ka deklaruar se tërheqja e kërkesës nga Presidentja Vjosa Osmani në Gjykatën Kushtetuese nuk e ndalon domosdoshmërisht trajtimin e saj nga kjo gjykatë.

Sipas Cakollit, Kushtetuesja ka të drejtë ta vazhdojë shqyrtimin kur vlerëson se ka interes publik madhor.

“E në një situatë ku Kuvendi nuk është konstituuar brenda afatit kushtetues dhe vendi ndodhet në vakum institucional, s’ka dilema se ky është një ndër rastet më serioze, që kërkon përgjigje të qartë nga autoriteti i vetëm që ka mandat ta japë atë,” ka shkruar ai.

Cakolli ka theksuar se kjo çështje duhet të trajtohet deri në fund nga Kushtetuesja, jo vetëm për rëndësinë që ka për funksionimin e institucioneve, por edhe për të ruajtur integritetin e vet institucional.

“Sikur të mos mjaftonte kjo, kërkesat aktuale të partive politike nuk e adresojnë qartë çështjen e pasojave juridike të moskonstituimit të Kuvendit brenda afatit 30-ditor,” shtoi ai.

Duke komentuar arsyetimin e Presidentes për tërheqjen e kërkesës për shkak të caktimit të gjyqtarit Radomir Llaban si raportues, Cakolli theksoi se gjyqtari raportues nuk e përcakton fatin përfundimtar të rastit.

“Nëse paneli prej tre gjyqtarësh propozon papranueshmëri dhe asnjë gjyqtar tjetër nuk e kundërshton, atëherë rasti mbyllet. Por mjafton që një gjyqtar tjetër të mos pajtohet, dhe rasti kalon për shqyrtim në përbërje të plotë të Gjykatës,” sqaroi ai.

Sipas tij, vendimi merret me shumicë votash për secilën pikë, përfshirë pranueshmërinë dhe përmbajtjen. Edhe nëse gjyqtari raportues nuk është pjesë e shumicës, me vendim të Kryetarit, tekstin final e harton një gjyqtar tjetër.