Krasniqi: Komunat që udhëhiqen nga PDK-ja janë kampione të transparencës dhe të menaxhimit të parasë publike

Kryetari i PDK-së, Memli Krasniqi, përmes një postimi në rrjetin social Facebook ka thënë se pesë komuna që udhëhiqen nga kjo parti kanë marrë vlerësim maksimal prej 100 pikësh nga Instituti GAP për performancë buxhetore në vitin 2024.

“Nga tetë komunat me shumicë shqiptare që udhëhiqen nga PDK-ja, pesë prej tyre, Kaçaniku, Mitrovica e Jugut, Prizreni, Skenderaj dhe Vushtrria, kanë arritur vlerësimin maksimal prej 100 pikësh nga Instituti GAP për transparencën buxhetore në vitin 2024”, ka thënë Krasniqi.

Sipas tij, Drenasi dhe Hani i Elezit gjithashtu janë ndër më të mirat, me nga 95 pikë secila.

“Në total, komunat tona janë kampione absolute të transparencës dhe të menaxhimit të parasë publike. Ky është standardi që PDK-ja sjell në qeverisje, kudo ku merr përgjegjësi. Më 12 tetor do të vazhdojmë punën për fitoren edhe në komuna të tjera, që sa më shumë qytetarëve t’u shërbejmë me punë, transparencë, zhvillim dhe shumë dashuri”, ka thënë Krasniqi.