Kompania e përfshirë në dramën e “KissCam” e punëson Gwyneth Paltrow si zëdhënëse

Astronomer — kompania, CEO e  së cilës dha dorëheqje pasi u kap në një KissCam në një koncert roku të Coldplay duke përqafuar një grua që nuk ishte gruaja e tij — po përpiqet të largohet nga drama me dikë që e njeh mjaft mirë grupin.

Aktorja Gwyneth Paltrow, e cila ishte e martuar me vokalistin e Coldplay, Chris Martin për 13 vjet, njoftoi të premten në X se është punësuar nga Astronomer si zëdhënëse.

Astronomer, një kompani teknologjike me seli në Nju Jork, e gjeti veten në një qendër të vëmendjes së pakëndshme kur dy nga drejtuesit e saj u kapën në kamera në një përqafim intim në një koncert të Coldplay — një moment që më pas u shfaq në një ekran gjigant në stadium, transmeton Klankosova.tv.

CEO Andy Byron dhe drejtuesja e burimeve njerëzore Kristin Cabot u kapën në befasi kur Martin u kërkoi kamerave të kapnin turmën gjatë një koncerti në fillim të këtij muaji.

“Ose po kanë një aferë ose janë thjesht shumë të turpshëm,” bëri shaka Martin kur çifti u shfaq në ekran dhe shpejt u përpoq të fshihte fytyrat e tyre, shkruan Associated Press, transmeton Klankosova.tv.

Në një video të shkurtër, ylli i “Shakespeare in Love” dhe “Ironman” tha se ishte punësuar si një zëdhënëse “shumë e përkohshme” për Astronomer.

“Astronomer ka marrë shumë pyetje gjatë ditëve të fundit dhe ata donin që unë t’u përgjigjesha më të zakonshmeve”, tha Paltrow, duke buzëqeshur dhe duke shmangur me shkathtësi përmendjen e bujës së KissCam.

“Jemi të emocionuar që kaq shumë njerëz kanë një interes të ri për automatizimin e rrjedhës së punës së të dhënave”, tha ajo. “Tani do të kthehemi në atë që bëjmë më mirë – duke ofruar rezultate që ndryshojnë lojën për klientët tanë.”

Kur pamjet nga KissCam u përhapën për herë të parë në internet, nuk ishte menjëherë e qartë se kush ishte çifti. Menjëherë pas kësaj, kompania identifikoi çiftin, dhe Byron dha dorëheqjen, i ndjekur nga Cabot. Videoklipi rezultoi në një rrjedhë të vazhdueshme memesh, videosh parodi dhe pamjesh të ekranit të fytyrave të shokuara të çiftit që mbushnin rrjetet sociale.