Sulmohet me thikë roja i kafiterisë, prangosen dy persona në Ferizaj

Policia e Kosovës ka bërë të ditur se ka arrestuar dy persona të dyshuar pasi që të njëjtit ishin të përfshirë në një sulm të rëndë fizik.

Sipas njoftimit të PK-së bëhet e ditur se ngjarja ka ndodhur më 25 korrik 2025, rreth orës 20:55, në rrugën “Dëshmorët e Kombit” në Ferizaj, raporton Zeri.info.

" Të dyshuarit, së bashku edhe me dy persona tjerë që ndodhen në arrati, kanë sulmuar me mjete të forta dhe me mjet të mprehtë – thikë, një viktimë mashkull kosovar. Viktima ishte duke ushtruar detyrën si sigurim fizik në një kafiteri në momentin e sulmit", thuhet në njoftimin e Policisë.

Po ashtu përmes njoftimit të PK-së, bëhet e dituir se për shkak të lëndimeve të marra, ai fillimisht ka marrë ndihmë në Qendrën Emergjente në Ferizaj dhe më pas është dërguar në QKUK për trajtim të mëtutjeshëm, pasi gjendja e tij është konsideruar e rëndë.

"Pas intervistimit, me vendim të prokurorit, të dyshuarit janë dërguar në mbajtje për 48 orë. Policia po vazhdon hetimet për identifikimin dhe kapjen e dy personave të tjerë të përfshirë në rast", thuhet në njoftimin e PK-së. /Zëri