Goditet për vdekje një këmbësor në magjistralen Prishtinë – Mitrovicë, konfirmohet nga Policia

Një këmbësor i moshës 53 vjeç është goditur për vdekje sot në rrugën magjistrale Prishtinë – Mitrovicë.

Lajmin për Zeri.info e ka konfirmuar zëdhënësi i Policisë së Kosovës për Rajonin e Prishtinës Agron Borovci.

“Rreth orës 18:30 policia ka pranuar informatën se në rrugën magjistrale “Prishtinë – Mitrovicë” respektivisht në fshatin Llazarevë, ka ndodhur një aksident trafiku me fatalitet. Mbështetur në informacionet fillestare, në aksident kanë qenë të përfshirë, një këmbësor dhe një automjet dhe si pasojë, këmbësori, mashkull, rreth 53 vjeç, ka humbur jetën”, ka thënë Borovci.

Borovci tha se njësia rajonale e trafikut rrugor së bashku me të gjithë mekanizmat relevant, kanë dalë në vendin e ngjarjes dhe po ndërmarrin të gjitha veprimet e nevojshme për ndriçimin e shkaqeve që kanë sjellë deri te aksidenti. /Zëri