Përfundon dëshminë Leonard Ademaj: Kërkojmë dënim kapital për të akuzuarit për vrasjen e Liridonës

Ka përfunduar seanca e sotme gjyqësore në rastin e tre të akuzuarve për vrasjen e Liridona Ademajt.

Leonard Ademaj, vëllai i Liridona Ademajt, ka përmbyllur dëshminë e tij në Gjykatën Themelore të Prishtinës.

Ademaj para trupit gjykues ka kërkuar të dënohet Naim Murseli.

“Mesazhi im dhe i familjes sonë është i qartë: Dënimi nuk na e kthen Liridonën, por të paktën le të jetë një shembull për të gjithë ata të cilët tentojnë të bëjnë një krim të tillë. Duke marrë parasysh natyrën e krimit, po ashtu rrethanat kriminale, dënimi të jetë kapital”, ka deklaruar Ademaj.

Ademaj është marrë pyetje nga Naim Murseli përgjatë dëshmisë së tij, ku ka përmendur edhe një aferë tradhtie nga ana e të akuzuarit pak muaj para ngjarjes makabër.

Pas dëgjimit të Leonard Ademaj në cilësinë e dëshmitarit, seanca ka përfunduar pasi nuk është paraparë dëgjimi i dëshmitarëve të tjerë.

Seanca e radhës gjyqësore do të vazhdojë më 22.09.2025 me dëgjimin e dëshmitarëve të tjerë për këtë rast.