Interi ka identifikuar pasuesin ideal të Çalhanoglut

Interi ka vënë në shënjestër mesfushorin e Atalantas, Ederson, si objektivin kryesor për përforcimin e mesfushës, sipas gazetarit të njohur Nicolo Schira. 

Mesfushori brazilian ka pasur një sezon të shkëlqyer 2024/2025 në Serie A, duke kontribuar me 7 gola dhe 4 asistime në 36 paraqitje për Atalantan.  

Kjo e ka ngritur vlerën e tij në treg, ku klubi bergamask e vlerëson të paktën 50 milionë euro, plus bonuse të ndryshme që mund të arrijnë shifra shtesë bazuar në performancën e lojtarit. 

Interi ka nisur bisedimet me agjentët e Edersonit dhe i ka propozuar një kontratë që do të zgjasë deri në qershor të vitit 2030, me një pagë vjetore prej 4 milionë eurosh plus bonuse të lidhura me performancën në fushë, duke treguar seriozitet dhe besim në aftësitë e lojtarit për të qenë pjesë kyçe e projektit të tyre afatgjatë. 

Sidoqoftë, përparimi i këtij transferimi varet shumë nga situata e Hakan Calhanoglu, mesfushorit turk të Interit, i cili mund të largohet nga klubi gjatë afatit të verës. 

Nëse Calhanoglu do të konfirmojë largimin, Inter është i gatshëm të intensifikojë përpjekjet për të përmbyllur marrëveshjen për Edersonin, duke e parë atë si një zëvendësues potencial me cilësi të lartë. 

Ky interes për Ederson vjen në një moment kur Interi po kërkon të forcojë mesfushën për të qenë konkurrues në të gjitha frontet, përfshirë Serie A dhe garat evropiane.  

Mesfushori brazilian njihet për aftësitë e tij teknike, vizionin në fushë, si dhe për kapacitetin për të kontribuar në fazën ofenzive dhe defanzive, çka e bën atë një përforcim shumë të vlefshëm për skuadrën zikaltër.